Цзиньпин Марказий Осиёни “рангли инқилоблар”га қарши туришга чақирди

ХХР Раиси Си Цзиньпин Хитой ва Марказий Осиё давлатлари “рангли инқилоблар”ни қўзғатишга бўлган ташқи уринишларга қаршилик кўрсатиши, терроризм ва сепаратизмга мутлақо тоқат қилмасликлари кераклигини айтди. Бу ҳақда Хитой етакчиси Сиань шаҳрида бўлиб ўтган “Хитой-Марказий Осиё” саммитида айтиб ўтди. 

Цзиньпиннинг фикрича, Хитой ва Марказий Осиёнинг бешта давлати Глобал хавфсизлик ташаббусини биргаликда амалга ошириши керак.

“Олтилик давлатлари уларга нисбатан бўлаётган ташқи аралашувга, шунингдек, “рангли инқилоблар”ни қўзғатишга уринишларга қатъий қаршилик кўрсатиши керак. Терроризм, сепаратизм ва экстремизм каби “уч кучи”га нисбатан муросасиз курашиш керак”, дейди Хитой раҳбари.

Эслатиб ўтамиз, “Марказий Осиё – Хитой” саммити 18-19 май кунлари бўлиб ўтмоқда. Унда Си Цзиньпин, шунингдек, Қозоғистон Президенти Қосим-Жомарт Тўқаев, Қирғизистон Президенти Садир Жапаров, Тожикистон Президенти Имомали Раҳмон, Туркманистон Президенти Сердар Бердимуҳамедов ва Ўзбекистон Президенти Шавкат Мирзиёев иштирок этмоқда.

Ўзбекистон Президенти Шавкат Мирзиёев 19 май куни Сиань шаҳрида “Марказий Осиё - Хитой” биринчи саммитида нутқ сўзлаган эди. У саммит асрлар давомида бутун Евроосиёнинг цивилизациявий ривожида ўзаро боғлиқлиги ва тараққиётида муҳим омил бўлган Буюк Ипак йўлининг бошланиш нуқтаси бўлиб хизмат қилган кўҳна Сиань шаҳрида ўтаётгани рамзий маънога эгалигини таъкидлаган.