Трампнинг вертолёти лазер билан “нишонга олинди”

Жорий йилнинг 20 сентябрь куни Оқ уй яқинида АҚШ Президенти Дональд Трампнинг Marine One вертолётига лазер нури йўналтирилди. Буни содир этган эркак эса ушланди. Бу ҳақда суд ҳужжатига таяниб, “Fox News” хабар берди.

Суд ҳужжатида келтирилишича, АҚШнинг биринчи шахсларини қўриқлаш билан шуғулланувчи Махфий хизмат ходими “Жанубий президент боғи” яқинида уст-бошисиз, ўзи билан ўзи гаплашаётган шубҳали эркакни пайқаган. Кейинроқ унинг исми Жейкоб Самуэль Уинклер экани маълум бўлган.

Қоронғида Махфий хизмат ходими чироқни Уинклернинг юзига йўналтирганда, у жавобан лазер нури билан унга қарата йўналтирган. Шу пайтда устидан Marine One вертолёти учиб ўтаётган бўлган ва ҳужжатга кўра, Уинклер лазер нурини вертолёт томон ҳам йўналтирган.

Махфий хизмат ходими Уинклернинг ҳаракатлари “учувчининг тўсатдан кўр бўлиб қолиши ва чалғиши”, шунингдек вертолёт ҳалокатига сабаб бўлиши мумкин, деб ҳисоблаб, уни дарҳол қўлга олган. Шундан сўнг Уинклер тиз чўкиб, Трампдан узр сўраши кераклигини айтган.

Сўроқ вақтида Уинклер лазер нурини вертолётга йўналтирганини тан олган. У бундай қилиш мумкин эмаслигини билмаганини айтиб, кўпинча лазер нури билан йўл белгиларига ва атрофдаги нарсаларга йўналтириб ўйнашини тушунтирган. Унинг ёнидан кичик пичоқ ҳам топилган.

Уинклер ҳозирда ҳибсга олинган. У беш йилгача озодликдан маҳрум этилиши ва 250 минг доллар жаримага тортилиши мумкин. NBC News’га кўра, АҚШда Уинклернинг бу қилмиши федерал даражадаги оғир жиноят ҳисобланади.

Ҳозирча Уинклернинг ҳаракатлари Marine One учувчисига қандай таъсир қилгани ва ўша пайтда Дональд Трамп вертолёт бортида бўлган-бўлмагани номаълум.

Эслатиб ўтамиз, аввалроқ Дональд Трампнинг Флорида штатидаги Мар-а-Лаго қароргоҳига бостириб кирган америкалик йигит 23 ёшли Энтони Рейесни ҳибсга олинганди. У Президентнинг набирасига уйланишни хоҳлашини айтган.