Трампнинг тинчлик режаси республикачиларни бўлиб юборди – ОАВ

АҚШ Президенти Дональд Трампнинг Украина бўйича тинчлик режасига нисбатан Республикачилар партияси ичида келишмовчилик юзага келди. Бу ҳақда “Financial Times” хабар берди.

Республикачи қонунчилар бу масалада иккига бўлинган. Бир нечта сенаторлар, жумладан, республикачиларнинг сенатдаги собиқ етакчиси Митч Макконнелл ва Трампнинг ашаддий тарафдори Линдси Грэм ҳам уни очиқ танқид қилган. Республикачи Том Тиллис Путинни қотил деб атаган ва ҳар қандай келишув украиналикларнинг ўзи хоҳлаган шаклда бўлиши кераклигини айтган.

“Биз уни ўзини ғолибдек ҳис қиладиган ҳеч қандай иш қилмаслигимиз керак”, дейди сиёсатчи Галифаксдаги халқаро хавфсизлик форумида нутқ сўзлар экан.

Шу билан бирга, сенатор Эрик Шмитт ҳужжатни қўллаб-қувватлаб, Дональд Трампнинг ёндашувини реалистик деб атаган.

Эслатиб ўтамиз, аввалроқ Украина делегацияси Женевадаги музокаралар якунлари бўйича тайёрланган тинчлик келишуви лойиҳаси Украина миллий манфаатларига тўлиқ мос келишини билдиргани ҳақида хабар берилган эди. АҚШ Давлат котиби Марко Рубио, Президент Дональд Трампнинг Яқин Шарқ бўйича махсус вакили Стив Уиткофф ва Президентнинг куёви Жаред Кушнер Украина делегацияси билан биргаликда тинчлик келишуви лойиҳаси матнини якуний кўриб чиққан.