Трампнинг хотини Байденнинг ўғлидан 1 млрд доллар ундирмоқчи

АҚШнинг биринчи хоними Мелания Трамп собиқ президент Жо Байденнинг ўғли Хантер Байденга қарши бир миллиард доллардан ортиқ миқдорда суд даъвоси киритиш билан таҳдид қилди. Бу ҳақда биринчи хонимнинг адвокатларига таяниб, “The Economic Times” хабар берди.

Жорий йилнинг август ойи бошида Хантер Байден журналист Эндрю Каллаханга интервью бериб, унда молиячи Жеффри Эпштейн ишига оид ҳануз эълон қилинмаган ҳужжатлар АҚШ Президенти Дональд Трампни “фош этишини” айтган. Байденнинг таъкидлашича, “Эпштейн Меланияни Трамп билан таништирган ва алоқалар кенг ва чуқурлашиб кетган”. 

Биринчи хоним манфаатларини ҳимоя қилаётган адвокатнинг айтишича, Мелания Байденни Трампга нисбатан айтилган “ёлғон, обрўсизлантирувчи ва ҳурматсиз” баёнотлардан воз кечишга чақирган. Унга кўра, агар бу талаб бажарилмаса, Мелания Трамп “ўзига етказилган катта молиявий ва обрў зарарини қоплаш учун” барча қонуний чораларни кўради. Адвокатнинг айтишича, Байденнинг бу даъволарини кўплаб ОАВ ҳамда миллионлаб обуначиларга эга ижтимоий тармоқ фойдаланувчилари тарқатган.

Мелания Трамп Дональд Трампга 2005 йилда турмушга чиққан. Улар 1998 йилниннг ноябрида модалар агентлиги эгаси уюштирган кечада танишган. Дональд Трамп Эпштейн билан таниш бўлганини тан олган, бироқ 2000 йиллар бошида молиячи унинг гольф-клуби ходимларини ўзига оғдиргани учун у билан алоқани узганини айтган.

Жеффри Эпштейн одам савдоси ва уларни жинсий эксплуатация қилишда айбланган. Тергов версиясига кўра, у вояга етмаган қизлардан жинсий хизматда фойдаланган ва уларни нуфузли шахсларга “тақдим этган”. 

Эслатиб ўтамиз, аввалроқ АҚШ Федерал қидирув бюроси молиячи Жеффри Эпштейн иши бўйича ҳужжатларни таҳрир қилгани, улардан Оқ уй раҳбари Дональд Трамп ва бошқа таниқли шахсларнинг исмлари олиб ташлангани ҳақида хабар берилганди.