Трампга уюштирилган суиқасдга дунё лидерлари қандай муносабат билдирди?

Кеча, 13 июль куни АҚШ президентлигига номзод Дональд Трампга Пенсильваниядаги тарафдорлари билан учрашув вақтида номаълум шахс томонидан ўқ узилиб, суиқасд уюштирилди. Оқ уй собиқ раҳбарининг ҳаётига қилинган тажовузга дунё мамлакатларининг расмийлари қандай муносабат билдирди?

Владимир Зеленский, Украина Президенти

“Трампни отишганини қоралайман. Тўғриси, суиқасддан даҳшатга тушдим. Бундай  зўравонликни оқлаб бўлмайди ва дунёнинг ҳеч бир жойида бундайларга жой йўқ. Дунёда ҳеч қачон зўравонлик устун бўлмаслиги керак”, деб ёзган Зеленский Х саҳифасида.

Шунингдек, Зеленский АҚШнинг Украинага кўрсатаётган ҳарбий ёрдамини тез-тез танқид қилиб келаётган Трампнга тезроқ тузалиб кетишини тилаган. 

Кир Стармер, Буюк Британия Бош вазири

“Мен президент Трамп митингидаги шокка солувчи манзарадан даҳшатга тушдим ва биз унга ва унинг оиласига энг яхши тилакларимизни билдирамиз. Бизнинг жамиятимизда ҳар қандай шаклдаги сиёсий зўравонликка жой йўқ, менинг ўй-хаёлларим ҳалиям ушбу ҳужум жабрланувчиларида қоляпти”, деган Стармер.

Урсула фон дер Ляйен, Еврокомиссия раҳбари

“Трампнинг  Пенсильваниядаги чиқишида унга қилинган суиқасддан қаттиқ шокка тушдим. Демократияда сиёсий зўравонликка ўрин йўқ”, деган у ўз саҳифасида.

У, шунингдек, воқеа пайтида ҳалок бўлган томошабинга ишора қилиб, бегуноҳ қурбоннинг оиласига ҳамдардлик билдирган.

Жоржиа Мелони, Италия Бош вазири

“Мен Трампга ҳамдардлик билдираман ва тез орада соғайишини тилайман, умид қиламанки, сайловолди кампаниясининг кейинги ойларида мулоқот ва масъулият нафрат ва зўравонликдан устун келади”, деган у.

Камола Ҳаррис, АҚШ вице-президенти

“Трамп жиддий жароҳат олмаганидан хурсандмиз. Биз у, унинг оиласи ва бу маъносиз отишмадан жабрланганларнинг барчаси учун дуодамиз. Биз ходимлари тезкор реакция кўрсатгани учун АҚШ Махфий хизматига ҳамда зудлик билан чора кўрганлари учун маҳаллий расмийларга миннатдорчилик билдирамиз. Мамлакатимизда бундай зўравонликка ўрин йўқ. Биз барчамиз бу жирканч ҳаракатни қоралашимиз ва у навбатдаги зўравонлик ҳолатларига олиб келмаслиги учун қўлимиздан келганини қилишимиз лозим”, дейди Ҳаррис.

Барак Обама, АҚШнинг 44-президенти

“Бизнинг демократиямизда сиёсий зўравонликка мутлақо ўрин йўқ. Ҳали нима бўлмаганини аниқ билмасак-да, биз барчамиз собиқ президент Трамп жиддий жароҳатланмаганидан енгил тортишимиз ва шу вазиятдан сиёсатимизга содиқлигимизни тасдиқлаш учун фойдаланишимиз керак. Мишель ва мен унга тез орада соғайиб кетишини тилайман”, деган у.

Илон Маск, SpaceX асосчиси

“Мен президент Трампни тўлиқ қўллаб-қувватлайман ва унинг тез орада соғайиб кетишига умид қиламан”, деган бизнесмен.

Бундан ташқари, Ўзбекистон Республикаси Президенти Шавкат Мирзиёев ҳам Дональд Трампга қилинган суиқасдни қоралаб, унга тез фурсатда соғайиб кетишини тилади.

Шу пайтгача АҚШнинг қайси президентларига суиқасд уюштирилган?

АҚШ ташкил топганидан бери тўртта президент ва бир номзод ўлдирилган. Улар:

• 16-президент Авраам Линкольн 1865 йилда;
• 20-президент Жеймс Абрам Гарфилд 1881 йил;
• 25-президент Уильям Мак-Кинли 1901 йилда;
• 35-президент Жон Кеннеди 1965 йил;
• 1968 йилда президентликка номзод Роберт Кеннеди.

Бундан ташқари, яна Оқ уйнинг собиқ етти раҳбарига суиқасд қилинган:

• 26-президенти Теодор Рузвельт 1912 йилда;
• Номзод Жорж Уоллес 1972 йилда;
• 32-президент Франклин Рузвельт 1933 йилда;
• 33-президент Гарри Трумэн 1950 йилда;
• 38-президент Жеральд Форд 1975 йил;
• 40-президент Рональд Уилсон Рейган 1981 йил;
• 43-президент Жорж Уокер Буш 2005 йилда.

Эслатиб ўтамиз, аввалроқ  АҚШ Федерал қидирув бюроси томонидан Трампни отган одамнинг шахси очиқланди. Унга кўра, Оқ уйнинг собиқ раҳбарига уюштирилган суиқасдни Пенсильвания штати, Бетел-Парк шаҳарчасида яшовчи 20 ёшли Томас Мэтью Крукс уюштиргани тасдиқланди.