Трамп Зеленскийнинг тинчлик битими ҳақидаги сўзларини “энг ёмон баёнот” деб атади

АҚШ Президенти Дональд Трамп Украина Президенти Владимир Зеленскийнинг тинчлик битимига ҳали “жуда, жуда узоқ” экани борасидаги сўзлари Украина раҳбарининг “энг ёмон баёноти” эканини айтди. Бу ҳақда Оқ уй раҳбари ўзининг Truth Social тармоғида ёзиб қолдирди.

“Бу Зеленский айтган энг ёмон баёнот ва Америка бунга узоқ вақт чидаб турмайди! Мен шуни айтмоқчиманки, бу одам Америка томонидан қўллаб-қувватланар экан, тинчликни хоҳламайди. Европа эса Зеленский билан учрашувда АҚШсиз бардош бера олмаслигини тўғридан тўғри таъкидлади. Бу, эҳтимол, Россияга қарши куч кўрсатиш нуқтаи назаридан энг яхши баёнот эмас. Улар нимани ўйлаяпти?”, дея ёзган Трамп.

Қўшма Штатлар раҳбари ўз постига “Associated Press” агентлигига Зеленскийнинг гапидан иқтибос келтирилган мақолани илова қилди, унда Украина Президенти тинчлик келишувига ҳали узоқ йўл борлигини айтади, аммо АҚШнинг қўллаб-қувватлаши давом этишига умид билдиради.

“Ўйлайманки, АҚШ билан муносабатларимиз давом этади, чунки бу тасодифий муносабатлардан каттароқ нарса”, дея АP Зеленскийнинг сўзларини келтирган. 

Оқ уйдаги жанжал

north_east

Дунё сиёсатчилари кимни қўлламоқда – Трамп ёки Зеленский?

Жорий йилнинг 28 февраль куни Владимир Зеленский ва Дональд Трамп Оқ уйда учрашди. Икки лидер АҚШ ва Украина ўртасида фойдали қазилмалар бўйича келишув имзолаши кутилган эди. Бироқ учрашув қизғин оҳангда бўлиб ўтди.

Учрашув давомида Трамп Зеленскийни бир неча бор ношукурликда айблаган.

Учрашувдан сўнг, Зеленский Америкага кўрсатган ёрдами учун миннатдорлик билдирди ва “Украинага адолатли ва мустаҳкам тинчлик керак ва биз айнан шу мақсадда ҳаракат қиляпмиз”, деб айтди.

Кўплаб европалик сиёсатчилар, жумладан Эммануэль Макрон Трамп билан бўлган жанжалдан кейин Украина раҳбарини қўллаб-қувватлади.