Трамп Зеленскийни Оқ уйда кутмоқда

Қўшма Штатлар Украина ресурсларини ўзлаштириш бўйича битим тузишда “маррага жуда яқин”, аммо ҳужжат Владимир Зеленскийнинг Вашингтонга бўлажак ташрифи вақтида имзоланмаслиги мумкин. Бу ҳақда бугун, 26 февраль куни Оқ уй матбуот котиби Каролина Ливитт журналистлар билан суҳбатда сўз очди.

“Президент Трамп айтганидек, муҳим минераллар ва нодир ерлар бўйича келишув мутлақо муҳим. Бу келишувни амалга ошириш нуқтаи назаридан биз маррага жуда яқинмиз”, деган Оқ уй матбуот котиби.

Унинг сўзларига кўра, Трамп Оқ уйда Зеленскийни кутмоқда.

“Президент (Трамп) кеча (25 февраль) Зеленскийни (келишувни) имзолаш учун Оқ уйга кутиб олишини ёки Зеленский буни хоҳласа, ташриф буюришини айтди”, деган Ливитт.

У гап Зеленскийнинг 28 февраль кунига режалаштирилган Вашингтонга ташрифи ҳақида кетаётганини тасдиқлаган. Шу билан бирга, у Оқ уй Миллий хавфсизлик кенгаши билан ушбу режалар ўзгарган-ўзгармаганини икки марта текширишга ваъда берган.

“Америка раҳбари аввалроқ ҳам бу келишув муҳим эканини таъкидлаган”, деган Оқ уй вакили

Эслатиб ўтамиз, аввалроқ кўплаб ОАВлар украиналик манбаларга таяниб, Украина ва АҚШ табиий ресурслар бўйича битим шартларига келишиб олгани, Вашингтон дастлаб таклиф қилинган энг қатъий шартлардан, хусусан, АҚШ Украина қазилма бойликларидан олинадиган потенциал 500 миллиард доллар даромадга эгалик қилиш талабидан кечгани ҳақида хабар берилганди.