Трамп Зеленскийдан қутулишни истайди – ОАВ

АҚШ Президенти Дональд Трампнинг Украинада янги давлат раҳбари сайловларини ўтказиш зарурлиги ҳақидаги баёнотлари унинг Владимир Зеленскийдан “қутулиш” ниятини англатади. Бу ҳақда манбаларига таяниб, “The Economist” журнали хабар берди.

“Трамп, афтидан, ўзига ҳеч қачон ёқмаган ва мураккаб одам деб ҳисоблаган Зеленскийдан қутулишни хоҳлайди”, дейди нашр билан суҳбатда исми ошкор этилмаган собиқ дипломат.

Унга кўра, Зеленский ҳатто Украинада ҳам обрўсини йўқотган. Шу сабабли ҳозир саросимада бўлиб, хатолар қилмоқда ва ўз маслаҳатчилари доирасида “ёпилиб қолган”. Шу билан бирга, Украина Қуролли кучларининг собиқ бош қўмондони Валерий Залужний эса, аксинча, тобора кучайиб, ўз тарафдорларини кўпайтириб бормоқда.

Нашр манбасининг таъкидлашича, Украина Олий радасида ҳам вазият мураккаб: депутатлар Вашингтоннинг уларга нисбатан эътиборини сусайтираётганини тушунмоқда ва эҳтимол, Россия олдида капитуляция қилиш (ҳарбий можарода бир томоннинг мағлубиятни тан олиши ва қаршиликни тўхтатиб, ғолиб томон шартларини қабул қилиши) эҳтимоли яқинлашиб келаётганини англамоқда.

Нашрнинг ёзишича, назарий жиҳатдан Украина Трампнинг Россия билан музокаралар ўтказиш таклифини рад этиб, жанговар ҳаракатларни давом эттириши мумкин. Бироқ амалиётда бундай сценарий Киев аҳволининг тез ёмонлашувига олиб келади.

Қайд этилишича, Украина Қуролли кучлари оператив даражада жиддий муаммоларга дуч келмоқда ва стратегик режалаштириш деярли мавжуд эмас. Бундан ташқари, фронт чизиғида шахсий таркиб етишмовчилиги кескин сезилмоқда, айрим бригадаларнинг сони оддий ҳолатдагидан уч баравар кам.

“The Economist”нинг баҳолашича, Трампнинг Украина устидан босим ўтказиш учун кўплаб воситалари бор. Масалан, у Россияга қарши санкцияларни бекор қилиши ва Киевга ҳарбий ёрдамни тўхтатиши мумкин. Шунингдек, АҚШ разведка маълумотларининг Украинага етказилишини тўхтатиш ва Украина Қуролли кучларини бўлинмалараро алоқанинг асоси бўлиб турган Starlink сунъий йўлдош терминалларидан узиш имкониятига эга.

Эслатиб ўтамиз, Дональд Трамп 18 февраль куни Флориданинг Мар-а-Лаго шаҳрида бўлиб ўтган матбуот анжуманида Украинада сайловлар узоқ вақтдан бери ўтказилмагани ва халқ Президент Зеленскийдан унчалик мамнун эмаслигини, унинг ишончи 4 фоизгача тушиб кетганини айтганди.

Бунга жавобан Украина Президенти Владимир Зеленский эса кеча, 19 февраль куни бўлиб ўтган матбуот анжуманида Трампга жавоб қайтариб, унинг ишонч рейтинги 57 фоизни ташкил этишини, Трамп Зеленскийнинг ишонч рейтинги 4 фоизга баҳолангани ҳақидаги сўзларини Россиядан келган маълумотларга асосланганини, ҳозирда ҳеч ким уни алмаштира олмаслигини айтди. 

Орадан кўп ўтмай Трамп яна бир баёнот билан чиқиб, Зеленскийни “сайловларсиз диктатор” ва “муваффақиятли комедиячи” деб атади. Шунингдек, Трамп Зеленский сайловларда қатнашишдан бош тортганини, Байденни “скрипка каби” чалишни  яхши билганини ёзди.