Тинчлик бўлмаса, 200 фоизлик бож: Трамп Россия ва Украинани огоҳлантирди

АҚШ Президенти Дональд Трамп тинчлик келишувига эришилмаса, Россия ва Украинага 200 фоизлик бож жорий этиш мумкинлигини айтди. Бу ҳақда у Флорида штатидаги Форт-Майерс шаҳрида республикачиларнинг сайловолди митингида сўз очди.

Унинг айтишича, божлар АҚШга 8 та урушни якунлашда ёрдам берган ва шу усулни Россия ҳамда Украинага нисбатан ҳам қўллаш мумкин.

“Ўйлашимча, бу усулни Украина ва Россияга нисбатан ҳам дарҳол қўллашимиз керакдир. Бу ҳақда аввал ўйламаган эканман. Бироқ бу ҳам самара бермаслиги мумкин, чунки биз улардан кўп нарса сотиб олмаймиз“, деган Трамп.

Оқ уй Трамп якунланганини даъво қилаётган саккизта можаро қаторига Арманистон ва Озарбайжон, Таиланд ва Камбоджа, Исроил ва Эрон, Исроил ва ҲАМАС, Руанда ва Конго Демократик Республикаси, Ҳиндистон ва Покистон, Сербия ва Косово, шунингдек, Миср ва Эфиопия ўртасидаги можароларни киритади. Уларнинг барчаси ҳам ҳарбий тўқнашув бўлмаган.

Трамп шу ҳафта бошида Украина бўйича тинчлик келишувига эришиш имконияти ҳар қачонгидан ҳам яқин бўлиши мумкинлигини айтганди. У Россия Президенти Владимир Путин билан телефон орқали гаплашганини ва томонлар ечимга яқинлашаётганини билдирган.

Жорий йилнинг 21 октябрь куни эса Путин Санкт-Петербургда Трампнинг махсус вакили Стив Уиткофф билан учрашди. Уч соатдан ортиқ давом этган музокараларда Украина урушини ҳал қилиш масаласи ҳам муҳокама қилинди. Уиткофф Россия раҳбарига тинчлик бўйича таклифларни етказди.

Шунингдек, учрашувдан сўнг Россия Президенти ёрдамчиси Юрий Ушаков Москва ноябрь ойининг биринчи ярмида АҚШ ва Украина билан уч томонлама музокараларни қайта бошлашга тайёрлигини маълум қилган эди.

Эслатиб ўтамиз, аввалроқ АҚШ Президенти Дональд Трамп “Грэм қонуни“ бўйича киритилиши керак бўлган Россияга қарши янги “дўзахий“ санкцияларни музлатиш тўғрисидаги фармонни имзолаган эди.