Трамп ЕИга ҳам божлар билан таҳдид қилмоқда

АҚШ Президенти Дональд Трамп тез орада Европа Иттифоқидан импорт қилинадиган товарларга божлар жорий этиш ниятида. Бу ҳақда у кеча, 2 февраль куни маълум қилди.

“Менда жадвал йўқ, лекин бу жуда тез содир бўлади”, деди Трамп.

Президент Европа Иттифоқи АҚШдан фойдаланди, деб шикоят қилди. Трампнинг сўзларига кўра, Қўшма Штатларнинг ЕИ билан савдо камомади 300 миллиард долларга етган.

“Атлантика океанининг нариги томонидаги ҳамкор АҚШдан ҳеч қандай машина ёки қишлоқ хўжалиги маҳсулотларини олиб кетмайди, Қўшма Штатлар эса “ҳамма нарсани олади”, деб тушунтирди Оқ уй раҳбари.

Бундан бир кун аввал Трамп Канада, Хитой ва Мексикадан келган маҳсулотларга божлар жорий қилган эди. Қўшма Штатларга қўшни Канада ва Мексика товарлари учун ставка 25 фоизгача бўлади, Канада энергия ресурслари учун ставка эса 10 фоиз қилиб белгиланган. Худди шу ўн фоизлик ставка Хитойдан келган товарларга ҳам нисбатан қўлланилади.

Бу ҳаракат нафақат Оттава, Пекин ва Мехикода танқидга учради. Қўшма Штатлардаги қатор касаба уюшмалари Вашингтон позициясини қоралади.

Европа Иттифоқи Трампнинг қароридан афсусда эканини билдирди ва Брюссель ноҳақ ёки ўзбошимчалик билан тарифларни жорий қилган ҳар қандай савдо шеригига “қатъий жавоб бериши” ҳақида огоҳлантирди.

Қайд этиш жоиз, Европа Комиссияси раҳбари Урсула фон дер Ляйен январь ойида Оқ уйни Европа билан савдо урушини бошлашдан огоҳлантирган, аммо музокараларга тайёрлигини билдирган.

Эслатиб ўтамиз, 30 январь куни Дональд Трамп BRICS давлатларига ҳам халқаро тўлов воситаси сифатида АҚШ долларидан воз кечса, 100 фоизлик божлар жорий қилиш билан таҳдид қилганди.