Трамп Яқин Шарқда “олтин аср” бошланишини айтди

Эрон билан икки ҳафталик ўт очишни тўхтатиш бўйича келишув ва низони ҳал қилиш бўйича бўлажак музокаралар фонида АҚШ Президенти Дональд Трамп Яқин Шарқда “олтин аср” бошланишини айтди. Бу ҳақда у ўзининг Truth Social ижтимоий тармоғидаги саҳифасида ёзди.

“Бутун дунёдаги тинчлик учун буюк кун! Эрон бу содир бўлишини хоҳлайди, улар тўйиб кетишди! Бошқалар каби! Америка Қўшма Штатлари Ҳормуз бўғозидаги блокада билан боғлиқ муаммони ҳал қилишга ёрдам беради. Кўплаб ижобий ҳаракатлар бўлади! Бу Яқин Шарқ учун олтин аср бўлиши мумкин!” деб ёзди республикачи.

Трампнинг қўшимча қилишича, Эрон қайта тикланиш жараёнини бошлаши мумкин ва “катта пуллар” ишлаб топилади.

Кеча, 7 апрель куни АҚШ Президенти Дональд Трамп Эрон билан икки ҳафталик ўзаро ўт очишни тўхтатиш бўйича сулҳга эришилганини эълон қилди. Америка етакчисининг аниқлик киритишича, ушбу қарор Покистон Бош вазири Шаҳбоз Шарифнинг таклифи ҳамда “Эрон Ислом Республикасининг Ҳормуз бўғозини тўлиқ, зудлик билан ва хавфсиз тарзда очишга тайёрлиги” инобатга олинган ҳолда қабул қилинган. Эрон давлат телевидениесининг хабар беришича, Теҳрон ўт очишни тўхтатиш бўйича 10 та шартни илгари сурган ва АҚШ “уларга рози бўлишга мажбур бўлган”. Улар орасида ҳужум қилмаслик тамойили, Теҳроннинг Ҳормуз бўғози устидан назорати, Эрон ҳудудида уранни бойитиш, асосий ва иккиламчи санкцияларни бекор қилиш, товон пули тўлаш, Америка кучларини минтақадан олиб чиқиб кетиш каби шартлар бор. Шариф Эрон ва АҚШ делегацияларини “барча низоларни ҳал қилиш бўйича якуний келишувга эришиш” учун 10 апрель куни Исломободга музокаралар столига таклиф қилди. CNN телеканали хабарига кўра, Америка делегацияси таркибидан вице-президент Жей Ди Венс, президентнинг махсус элчиси Стив Уиткофф ва Трампнинг куёви Жаред Кушнер ўрин олади.