Трамп Украинанинг қилган ишидан ғазабланди

АҚШ Президенти Дональд Трамп Венгрия Бош вазири Виктор Орбанга ёзган мактубида Украинанинг “Дружба” нефть қувурига қилган зарбаларидан жуда ғазабланганини билдирди. Бу ҳақда “24.hu” хабар берди.

Орбан ва Трамп ўртасидаги хатнинг нусхаси Венгрия матбуотида эълон қилинган. 

“Беш кун аввал, Трамп ва Путин тарихий учрашуви арафасида, Украина Россиядаги “Дружба” нефть қувурига дронлар билан зарба берди. Венгрия Украинага электр ва ёнилғи билан ёрдам бериб келмоқда, лекин бунинг эвазига улар бизни таъминлайдиган қувурни уришди. Бу жуда душманона қадам”, дея ёзган Орбан. 

У, шунингдек, Венгрия ва Словакиянинг бошқа хом нефть манбаларига эга эмаслигини ҳам таъкидлаган. 

Трамп эса хатга ўз қўллари билан жавоб ёзган. 

“Виктор, буни эшитиб афсусландим ва жуда ғазабландим”, дея жавоб йозган Трамп. 

Украина Қуролли кучларининг “Дружба” нефть қувури инфратузилмасига зарба бергани ҳақида илк хабарлар 22 август куни эрталаб тарқалган. Будапештнинг баҳолашича, қувур камида беш кунга ишдан чиққан. Қувур Брянск вилоятидан ўтади. Ҳудуд губернатори Александр Богомазнинг айтишича, Украина кучлари Унечский туманидаги ёнилғи инфратузилмасига ҳужум қилган, кечаси эса ҳаво ҳужумидан мудофаа тизими 20 га яқин дронни уриб туширган.

Эслатиб ўтамиз, аввалроқ Венгрия Бош вазири Виктор Орбан Украинанинг НАТОга аъзо бўлиши Россия билан қуролли тўқнашувга ва эртаси куни Учинчи жаҳон урушига олиб келишини айтганди.