Трамп Украинага Tomahawk ракеталарини юборишни рад этди

АҚШ Президенти Дональд Трамп Киевга Tomahawk ракеталарини юборишни режалаштирмаётганини айтди. Бу ҳақда Оқ уй раҳбари кеча, 2 ноябрь куни Air Force One бортида журналистлар билан бўлган суҳбатда маълум қилди.

Мухбирлар Трампдан АҚШ бу ракеталарни Украинага беришни ўйлаяптими, деб сўраган ва Трамп уларга “йўқ” дея жавоб берган. 

Оқ уй раҳбари, шунингдек, жанглар ҳали давом этишига ишора қилган. 

“Иккала томон ҳам жанг қилмоқда. Улар учун ҳам қийин. Баъзан курашни давом эттириш керак”, деган Трамп. 

Бундан ташқари, Америка раҳбари музлатилган Россия активларини мусодара қилиш бўйича музокараларда қатнашмаётганини айтган.

Қолаверса, у Зеленский Киев АҚШдан Tomahawk’ка ўхшаш қуролларни сўраётганини айтган, аммо унга нисбатан АҚШнинг жавоби қандай бўлгани ҳақида Трамп гапирмаган. 

Октябрь ойи охирида CNN нашри манбаларга таяниб, Пентагон Киевга узоқ масофали Tomahawk ракеталарини топширишга рухсат бергани ва бу Америка арсеналларига салбий таъсир кўрсатмаслиги ва якуний қарорни Трампга қолдирганини хабар қилди.

Қайд этиш жоиз, Трамп Оқ уйда украиналик мавқедоши Владимир Зеленский билан сўнгги учрашувида Киев яқин орада Tomahawk ракеталарини олишини кутмаслиги кераклигини айтганди. Манбаларга кўра, Трамп очиқчасига гапирган ва унинг устувор вазифаси “урушни тугатиш” эканини таъкидлаган. Бироқ, бундан олдин Оқ уй раҳбари Tomahawk ракеталарини Киевга топшириш ҳақида “деярли қарор қабул қилганини” айтган эди.

Эслатиб ўтамиз, аввалроқ Дональд Трамп НАТО Бош котиби Марк Рютте билан учрашувда Американинг узоқ масофали Tomahawk қанотли ракеталаридан фойдаланиш бўйича машғулотлар олти ойдан бир йилгача давом этиши ҳақида айтганди.