Пентагон Киевга Tomahawk етказиб беришни маъқуллади – CNN

Пентагон Украинага Tomahawk ракеталарини етказиб беришга рухсат берди ва бу АҚШ захираларига сезиларли таъсир кўрсатмаслигини аниқлади. Бу ҳақда CNN хабар берди.

Нашрга кўра, Пентагон АҚШ захиралари етарли эканини баҳолагандан сўнг, Украинага узоқ масофали Tomahawk ракеталарини етказиб беришни маъқуллаган. Энди АҚШ Президенти Дональд Трамп бу масала бўйича якуний қарор қабул қилиши керак.

Нашр жорий йилнинг октябрь ойи бошида – Украина Президенти Владимир Зеленский билан ишчи тушлик пайтида Трамп Киевга Tomahawk ракеталарини етказиб бермасликни афзал кўришини айтганини эслатган, чунки улар Қўшма Штатларни ҳимоя қилиш учун зарур.

Манбанинг хабар беришича, Пентагоннинг ушбу қарори “Европа Иттифоқи вакилларини рағбатлантириш бўлган”, улар энди Вашингтоннинг ракеталарни етказиб беришдан бош тортиш учун камроқ асослари бор, деб ҳисоблайди. Оқ уй ва Пентагон бу ҳақда нашр сўровларига ҳеч қандай жавоб бермаган.

Манба, шунингдек, илгари ҳам Трамп ракета масаласини кун тартибидан олиб ташламагани ва агар Президент буйруқ берса, унинг маъмурияти ракеталарни Украинага тезкор етказиб бериш режалари тайёр эканини айтган.

Телеканал маълумотларига кўра, ҳозир Пентагон Украина армияси Tomahawk ракеталарини қандай жойлаштириши ва учириши бўйича қарор қабул қилмоқда. Кўпинча улар кемалар ёки сувости кемаларидан учирилади, аммо Украина ҳарбий флоти абгор аҳволда.

Эслатиб ўтамиз, аввалроқ Дональд Трамп НАТО Бош котиби Марк Рютте билан учрашувда Американинг узоқ масофали Tomahawk қанотли ракеталаридан фойдаланиш бўйича машғулотлар олти ойдан бир йилгача давом этиши ҳақида айтганди. Унинг бу сўзлари Украинага бундай турдаги қуроллар ҳали етказиб берилмаслигини айтиши фонида янграган.