Трамп Украинага Patriot тизимлари етказиб берилишини эълон қилди

Қўшма Штатлар Patriot ҳаво мудофаа тизимларини Украинага топширади. Бу ҳақда кеча, 13 июль куни АҚШ Президенти Дональд Трамп Мэриленд штатидаги Эндрюс қўшма базасида маълум қилди.

Оқ уй раҳбари ўзини Россия агрессиясидан ҳимоя қиладиган мамлакат қанча тизим олишига аниқлик киритмади. Трампнинг сўзларига кўра, уларнинг “баъзилари” Украинага ўтказилади. Унинг тушунтиришича, Вашингтон бу тизимларни кейинчалик Киевга етказиб бериш учун Европа Иттифоқига сотиш ниятида.

“Биз учун бу бизнес бўлади. Ва биз уларга (украиналиклар) Patriot тизимларини юборамиз. Бу уларга зудлик билан керак”, деди Трамп.

Шунингдек, Америка Президенти қайси Европа Иттифоқи мамлакатларига ҳаво мудофаа тизимларини сотиш ҳақида гапираётгани ноаниқ бўлиб қолди.

“Биз НАТОга қурол жўнатамиз, НАТО эса бу қуроллар учун ҳақ тўлайди, 100%... Юборилган қуроллар НАТОга кетади, кейин эса НАТО бу қуролларни (Украинага) бермоқчи, бу қуроллар учун эса НАТО тўлайди”, деган эди Трамп 10 июль куни кечқурун NBC News телеканалига берган интервьюсида.

Ўз навбатида, АҚШ Давлат котиби Марко Рубио 11 июль куни Украинага зарур бўлган АҚШда ишлаб чиқарилган қуролларнинг айрим турлари АҚШнинг Европадаги НАТО иттифоқчилари билан бирга юборилишини таъкидлади. Унинг сўзларига кўра, бундай қуроллар Украинага юборилиши мумкин, Европа давлатлари эса АҚШдан ўрнига сотиб олади.

“Сиз бирор нарсани заводда (АҚШда) буюртма қилиш ва у ерга етказиб беришдан кўра, масалан, Германиядан Украинага тезроқ ташишингиз мумкин”, дея тушунтирди Давлат департаменти раҳбари Малайзияга сафари чоғида.