Трамп Туркияда. Уни Эрдўған кутиб олди (видео)

АҚШ Президенти Дональд Трамп бугун, 7 июль куни Туркия пойтахти Анқарада ўтадиган НАТО саммитида иштирок этиш учун мамлакатга етиб борди. Бу ҳақда “Anadolu” хабар берди.

Қайд этилишича, Трампни самолёт трапи олдида Туркия Президенти Ражаб Тойиб Эрдўғаннинг шахсан ўзи кутиб олган. Шундан сўнг АҚШ Президенти уни кутиб олган турк ҳарбийлари билан ҳам саломлашган.

Оқ уй матбуоти маълумотига кўра, кутиб олиш маросимида АҚШнинг Туркиядаги элчиси Том Баррак, АҚШнинг НАТОдаги доимий вакили Мэтт Уитакер ҳамда АҚШ Қуролли кучлари штаб бошлиқлари қўмитаси раиси генерал Дэн Кейн ҳам иштирок этган.

Маълум қилинишича, Трамп ўзини кутиб олиш учун саф тортган фахрий қоровулга қарата турк тилида “Мерҳаба аскер!” (“Салом, аскар!”) деб айтган.

Трампнинг Анқарага ташрифи Вашингтон билан НАТО ўртасидаги муносабатлар, хусусан, Трампнинг альянсга аъзо давлатларни мудофаа харажатларини етарли даражада оширмаётгани учун танқид қилиши фонида амалга ошмоқда.

Аввал хабар берилганидек, Трамп Туркияга етиб келишидан олдин НАТО бир неча миллиард АҚШ долларилик янги ҳарбий лойиҳаларни эълон қилганди. Альянс Бош котиби Марк Рютте бу маблағларни “ўринли сарфланган пул” деб баҳолаган.

Маълумот ўрнида, Трамп саммит доирасида Украина Президенти Владимир Зеленский билан учрашиши режалаштирилган. Бу уларнинг Францияда бўлиб ўтган “Катта еттилик” (G7) саммитидан кейинги уч ҳафта ичидаги иккинчи учрашуви бўлади. Ўша учрашувдан кейин Трамп Россия урушни тугатиш бўйича келишувга эришиши кераклигини айтган эди.

Шунингдек, Трамп Сурия Президенти Аҳмад аш-Шараа билан ҳам учрашади ва эртага, 8 июль куни Вашингтонга қайтишидан олдин матбуот анжумани ўтказади.