Трамп TikTok учун харидор топди

АҚШ Президенти Дональд Трамп Хитойнинг TikTok ижтимоий тармоғининг АҚШдаги бўлимига харидор топганини айтди. Бу ҳақда у кеча, 29 июнь куни “Fox News” телеканалига берган интервьюсида маълум қилди.

Америка раҳбари “жуда бадавлат одамлар” гуруҳи ижтимоий тармоққа қизиқаётганини билдирди, бироқ уларнинг исмини айтмади. Президент уларни “тахминан икки ҳафта ичида” ошкор қилишга ваъда берди.

Трампнинг сўзларига кўра, келишув Хитой раҳбари Си Цзиньпиннинг розилигини талаб қилиши мумкин.

“Менимча, Раис Си бунга розилик беради”, деди АҚШ Президенти.

АҚШ расмийлари Хитойнинг TikTok компаниясига эгалик қилувчи ByteDance концернидан Пекин ушбу ижтимоий тармоқнинг америкалик фойдаланувчиларининг шахсий маълумотларига кириш ҳуқуқига эга бўлишидан қўрқиб, АҚШдаги бўлинмасини сотишни талаб қилмоқда. Тегишли қонунни Трампдан олдинги президент, демократ Жо Байден имзолаган.

Ижтимоий тармоқнинг Америка бўлинмасини сотиш муддати 19 январь – Трамп инаугурациясидан бир кун олдин белгиланди. Бироқ Президент лавозимига киришгач, аввалига 5 апрелга, кейин эса яна 75 кунга узайтирди.

Илгари номи тилга олинган потенциал инвесторлар орасида технология гиганти Microsoft, сунъий интеллект стартапи Perplexity AI, шунингдек, миллиардер бизнесменлар Франк Маккорт, Марк Андриссен ва Бен Хоровиц бошчилигидаги компаниялар бор эди. 

Эҳтимолий харидорлар орасида Blackstone Group хусусий сармоя фирмаси ҳам тилга олинган. Унинг бош директори Стивен Шварцман Трампнинг нуфузли тарафдори ва Республикачилар партиясининг асосий донори ҳисобланади.

Келишувга энг эҳтимолий номзодлардан бири Oracle ҳисобланади. У аллақачон TikTok билан ҳамкорлик қилади ва Трампнинг биринчи президентлик даврида ушбу платформага қизиқиш билдирган.