Трамп тез орада Путин билан гаплашмоқчи

АҚШ Президенти Дональд Трамп тез орада Россия раҳбари Владимир Путин билан телефон орқали суҳбатлашишини маълум қилди. Бу ҳақда Оқ уй раҳбари кеча, 7 сентябрь куни журналистларнинг саволларига жавобан айтди.

Трамп Украинадаги жангларнинг давом этаётганидан норози экани, бироқ бу можарони тугатишини иддао қилган. 

“Мен у ердаги вазиятдан мамнун эмасман, буни ҳал қиламиз, лекин урушга оид ҳамма нарсадан норози бўляпман”, деган АҚШ раҳбари. 

Трамп, шунингдек, яқин кунларда бир неча Европа етакчилари АҚШга ташриф буюришини айтган, лекин уларнинг исмларини очиқламади. Бу ташрифда катта эҳтимол билан Украинага тинчликпарвар кучларини киритиш масаласи ўртага ташланиб, сўнгги қарорга келинади. 

Қолаверса, Оқ уй раҳбари яқин кунларда Путин билан ҳам мулоқот бўлиб ўтиши ва бу муҳим қадам эканини таъкидлаган. 

Кеча, 7 сентябрь куни Трамп Россияга қарши санкцияларни кучайтиришга тайёрлигини маълум қилди. АҚШ Молия вазири Скотт Бессант қўшимча босим АҚШ ва Европа томонидан кўрсатилса, Путин Украинага доир музокараларни бошлашга мажбур бўлиши мумкинлигини таъкидлади.

Трампнинг Украина бўйича махсус вакили Кит Келлог эса Россиянинг яқинда Украинадаги ҳукумат биносига ҳужумини “эскалация белгиси”, дея изоҳлади. У икки ҳафта аввал шу бинода Украина Бош вазири Юлия Свириденко билан учрашганини эслаб, бундай ҳужумлар вазиятни назоратдан чиқариб юборишини таъкидлади. Унинг фикрича, бу ҳужум Россиянинг дипломатик йўл билан урушни тугатишга интилмаётганидан дарак беради.
Украина маълумотларига кўра, 7 сентябрга ўтар кечаси Россия 810 дрон ва 13 ракета учирган, оқибатда камида етти киши, жумладан, икки ойлик чақалоқ ҳалок бўлган, ўнлаб одамлар яраланган. Уруш бошланганидан бери эса илк бор Киевдаги ҳукумат биноси вайрон бўлди. Бу ўз-ўзидан Россиянинг музокаралар учун ёпиқлигини кўрсатади. 

Эслатиб ўтамиз, жорий йилнинг 5 сентябрь куни Кремль матбуот котиби Дмитрий Песков “Аргументы и Факты” нашрига берган интервьюсида Россия Президенти Владимир Путин ва АҚШ раҳбари Дональд Трамп ўртасидаги иккинчи музокара раунди яқин вақт ичида бўлиб ўтиши мумкинлигини айтганди. Унга кўра, агар Президентлар зарур деб ҳисобласа, худди Аляскадаги сингари учрашув қисқа муддатда ташкил этилиши мумкин. Песковнинг сўзларига кўра, ишчи алоқалар йўлга қўйилган ва мунтазам давом этмоқда.