Трамп ва Путин яна учрашиши мумкин – Песков

Россия Президенти Владимир Путин ва АҚШ раҳбари Дональд Трамп ўртасидаги иккинчи музокара раунди яқин вақт ичида бўлиб ўтиши мумкин. Бу ҳақда Кремль матбуот котиби Дмитрий Песков бугун, 5 сентябрь куни “Аргументы и Факты” нашрига берган интервьюсида сўз очди.

Унга кўра, агар Президентлар зарур деб ҳисобласа, худди Аляскадаги сингари учрашув қисқа муддатда ташкил этилиши мумкин. Песковнинг сўзларига кўра, ишчи алоқалар йўлга қўйилган ва мунтазам давом этмоқда.

Бир томондан эса Трамп ҳам журналистларга яқин келажакда Путин билан суҳбатлашмоқчи эканини билдирган. 

Маълумот учун, жорий йилнинг 15 август куни АҚШнинг Аляска штатида Трамп ва Путиннинг учрашуви бўлиб ўтганди. Учрашув Тошкент вақти билан 16 август куни соат 04:25 да якунланди. Аляскада бўлиб ўтган музокаралар якунида Трамп ва Путин биргаликдаги матбуот анжуманида қатнашди.

Матбуот анжуманидан олдин Путин ва Трамп “учга-уч” форматида тахминан 2 соат 45 дақиқа давом этган музокаралар ўтказди. Трамп кўплаб масалалар бўйича келишувга эришилганини таъкидлади, бироқ Украина масаласида ҳали битим йўқлигини қайд этди. Путин эса музокараларни фойдали деб атаб, Россия Украинага хавфсизлик бўйича ишлашга тайёрлигини билдирди. Давлат раҳбарлари журналистларнинг саволларига жавоб бермади.

Эслатиб ўтамиз, аввалроқ Дмитрий Песков Европа Иттифоқи мамлакатлари Украинадаги можарони тинч йўл билан ҳал қилишга жиддий тўсқинлик қилаётганини билдирганди. Песковнинг айтишича, АҚШ Президенти Дональд Трампнинг қарашлари Европа давлатларидан фарқли равишда анча конструктив ва у уруш қилишдан кўра савдо қилишни афзал кўради. Песков, шунингдек, Трампнинг ёндашуви Россия позициясининг айрим жиҳатлари билан мос тушишини қайд этган.