Трамп собиқ сенаторни Хитойга элчи қилиб тайинламоқчи

АҚШнинг сайланган президенти Дональд Трамп собиқ сенатор Дэвид Пердьюни АҚШнинг Хитойдаги элчиси лавозимига номзод қилиб кўрсатди. Бу ҳақда “Reuters” хабар берди.

“Дэвид Хитой билан муносабатларимизни ривожлантириш учун қимматли тажрибага эга. У Сингапур ва Гонконгда яшаган, фаолиятининг катта қисмини Осиё ва Хитойда ўтказган”, дейди Трамп.

Билдирилишича, Дэвид минтақада тинчликни сақлаш ва Хитой етакчилари билан самарали ишбилармонлик алоқаларини ўрнатиш бўйича Трампнинг стратегиясини амалга оширишда муҳим роль ўйнайди. 

Маълумот учун, Дэвид Пердью 2015-2021 йиллар давомида АҚШ Конгрессининг Сенати таркибида ишлаган. Бунгача у Reebok ва Dollar General каби йирик компанияларда раҳбарлик лавозимларида фаолият юритган. Бундан ташқари, бир неча йил Сингапурдаги Gitano Group халқаро кийим-кечак ишлаб чиқарувчи компанияда бошқарувчи директор сифатида, шунингдек, Гонконгда Sara Lee корпорацияси бўлимида ишлаган.

Ҳозирда АҚШнинг Хитойдаги элчиси лавозимини Николас Бёрнс эгаллаб турибди.

Эслатиб ўтамиз, аввалроқ Дональд Трамп Жаред Айзекманни Қўшма Штатлар Миллий аэронавтика ва коинот бошқармаси (NASA)га раҳбарлик қилишга таклиф қилганди.