Трамп Шавкат Мирзиёевга мактуб йўллади

Бугун, 26 март куни Ўзбекистон Республикаси Президенти Шавкат Мирзиёев номига Америка Қўшма Штатлари Президенти Дональд Трампдан мактуб келди. Бу ҳақда Президент матбуот котиби Шерзод Асадов хабар берди.

Америка етакчиси ўз мактубида Ўзбекистон раҳбарининг жорий йил февраль ойида бўлиб ўтган “Тинчлик кенгаши”нинг илк йиғилишидаги иштирокини юксак баҳолаган.

Президент Шавкат Мирзиёев Ўзбекистонда улкан натижаларга эришаётгани таъкидланиб, мамлакатга ташриф билан келиш таклифи учун миннатдорлик билдирилган.

Ўз навбатида, Президент Дональд Трамп Ўзбекистон раҳбарини “Тинчлик кенгаши”нинг навбатдаги йиғилишига, шунингдек, Майамида ўтадиган G20 саммитига таклиф этган.

“Яратган сизни ва Ўзбекистоннинг буюк халқини ёрлақасин”, дейилади мактубда.

Эслатиб ўтамиз, аввалроқ ҳам Дональд Трамп Ўзбекистон Президенти Шавкат Мирзиёев билан телефон суҳбати ўтказиб, Ўзбекистон етакчисини G20 саммитида меҳмон сифатида иштирок этишга таклиф қилганди.