Трамп Шавкат Мирзиёевни G20 саммитига таклиф қилди

АҚШ Президенти Дональд Трамп Ўзбекистон Президенти Шавкат Мирзиёев билан телефон суҳбати ўтказиб, Ўзбекистон етакчисини G20 саммитида меҳмон сифатида иштирок этишга таклиф қилди. Бу ҳақда у бугун, 24 декабрь куни ўзининг “Truth Social”даги саҳифасида ёзди.

“Бугун эрталаб Қозоғистон Республикаси Президенти Қосим-Жомарт Тўқаев ва Ўзбекистон Республикаси Президенти Шавкат Мирзиёев  билан икки ажойиб телефон суҳбати ўтказдим. Биз давом этаётган можароларда тинчликка эришиш муҳимлиги, шунингдек мамлакатларимиз ўртасида савдо ва ҳамкорликни кенгайтириш масалаларини муҳокама қилдик. Ҳар иккала мамлакат билан муносабатларимиз аъло даражада.

Келаси йили Қўшма Штатлар G20 саммитига мезбонлик қилади ва биз ушбу жуда муҳим тадбирда меҳмон сифатида иштирок этиш учун ҳар икки етакчига таклифнома юборамиз. Саммит Майами шаҳрида бўлиб ўтади”, деб ёзган Трамп.

Эслатиб ўтамиз, аввалроқ Дональд Трамп Қозоғистон Президенти Қосим-Жомарт Тўқаев билан телефон орқали гаплашгани ҳақида хабар берилган эди. Етакчилар икки томонлама кун тартиби ҳамда жорий халқаро вазият, жумладан Украина масаласи юзасидан атрофлича фикр алмашган. Қосим-Жомарт Тўқаев жорий йил ноябрь ойида Вашингтонга амалга оширган ташрифи чоғида эришилган келишувларни тўлиқ амалга оширишга тайёр эканини тасдиқлаган.