Путиннинг ёнидан қайтган Тўқаев Трамп билан гаплашди

north_east

Трамп Тўқаевга Оқ уй калитини совға қилди

Бугун, 23 декабрь куни АҚШ ва Қозоғистон Президентлари Дональд Трамп ва Қосим-Жомарт Тўқаев ўртасида узоқ давом этган телефон мулоқоти бўлиб ўтди. Бу ҳақда Оқўрда хабар берди.

Билдирилишича, етакчилар икки томонлама кун тартиби ҳамда жорий халқаро вазият, жумладан Украина масаласи юзасидан атрофлича фикр алмашган.

Қосим-Жомарт Тўқаев жорий йил ноябрь ойида Вашингтонга амалга оширган ташрифи чоғида эришилган келишувларни тўлиқ амалга оширишга тайёр эканини тасдиқлаган.

Қозоғистон Президенти Украинадаги можарони ҳал этиш жуда мураккаб эканини таъкидлаб, унда ҳудудий масала устувор аҳамият касб этишини ва “жанг майдонидаги” реал вазиятни ҳисобга олган ҳолда ҳар икки томондан ҳам муросалар талаб этилишини қайд этган.

“Шу муносабат билан Қозоғистон барча манфаатдор томонларни сабр-тоқат, мослашувчанлик ва профессионаллик намоён этиб, тинчлик формуласи устида изланишларни давом эттиришга чақирмоқда. Айни пайтда мамлакатимиз воситачи ҳисобланмайди, аммо зарурат туғилса, яхши ният руҳида музокаралар учун майдон тақдим этишга тайёр”, дейилади Оқўрда хабарида.

Шунингдек, Қосим-Жомарт Тўқаев АҚШ Президентининг юксак етакчилик фазилатларини алоҳида қайд этиб, бу унга бир қатор халқаро ҳарбий можароларни якунлаш ва АҚШнинг ички салоҳиятини мустаҳкамлашда ижобий натижаларга эришиш имконини берганини таъкидлаган.

Суҳбат якунида Тўқаев Дональд Трампни ўзига қулай вақтда Қозоғистонга ташриф буюришга таклиф қилган ва бу ташриф тарихий воқеа бўлишига ишонч билдирган.

Маълумот учун, Тўқаев Трамп билан охирги марта жорий йил 7 ноябрь (Вашингтон вақти билан 6 ноябрь) куни Оқ уйда учрашганди. Ўша ерда Қозоғистон Иброҳим келишувларига қўшилди ва Тўқаев Трамп билан бирга Овал кабинетда Исроил Бош вазири Биньямин Нетаньяхуга телефон қилди. Ўша куни Оқ уйда C5+1 форматидаги Марказий Осиё давлатлари ва АҚШ Президентлари саммити ҳам бўлиб ўтди. АҚШдан қайтган Тўқаев 11–12 ноябрь кунлари Москвага давлат ташрифи билан борди ва Россия Президенти Владимир Путин билан учрашувлар ўтказди. Ташриф тугуганидан сўнг Россия Президенти ёрдамчиси Юрий Ушаков АҚШ Президенти Тўқаев орқали Путинга ҳеч қандай хабар ёки “сигнал” юбормаганини айтди. 

Эслатиб ўтамиз, 21-22 декабрь кунлари Қозоғистон Президенти Қосим-Жомарт Тўқаев Россиянинг Санкт-Петербург шаҳрида бўлиб, Олий Евроосиё иқтисодий кенгашининг навбатдаги йиғилиши ва Мустақил Давлатлар Ҳамдўстлиги давлатлари раҳбарларининг норасмий учрашувида қатнашганди. Тадбирлар давомида Тўқаев Путин билан учрашув ҳам ўтказди.