Путин Истанбулга борса, Трамп ҳам келади

north_east

Путин Зеленский билан учрашишга журъат эта олмайди – Каллас

АҚШ Давлат котиби Марко Рубио ва бошқа америкалик расмийлар Украина бўйича режаланган музокаралар учун Истанбулга боради. Бу ҳақда АҚШ Президенти Дональд Трамп кеча, 13 май куни Саудия Арабистонида бўлиб ўтган икки томонлама инвестиция форумида маълум қилди.

“Бизнинг одамлар у ерда бўлади. Марко [Рубио] у ерда бўлади. Бошқалар ҳам у ерда бўлади. Келинг, буни уддалай оламизми, кўрайлик”, деди АҚШ маъмурияти раҳбари.

Трамп Туркияда кутилаётган учрашувлар яхши натижа бериши мумкинлигини тахмин қилмоқда.

“Музокаралар Туркияда шу ҳафта охирида, эҳтимол, пайшанба куни бўлиб ўтиши жуда муҳим. Ва улар жуда яхши натижалар бериши мумкин”, деди Америка етакчиси тафсилотларга кирмасдан.

Оқ уй матбуот котибининг журналистлар билан суҳбатида аниқлик киритишича, Рубио, шунингдек, АҚШ Президентининг махсус вакили Стивен Уиткофф ва АҚШнинг Украина бўйича махсус вакили Кит Келлогг Истанбулга сафар қилмоқда.

Китт Келлоггнинг “Fox Business” нашрига берган интервьюсида  маълум қилишича, АҚШ Президенти Дональд Трамп, агар Россия Президенти Владимир Путин Туркияга келса, 15 май куни Россия ва Украина ўртасидаги алоқалар режалаштирилган Истанбулга бориши мумкин.

“Умид қиламизки, Президент Путин у ерда бўлади, кейин эса Президент Трамп ҳам келади. Бу ажойиб учрашув бўлади”, деди Келлогг.

АҚШ маъмуриятининг яна бир расмийси ҳам CNN телеканалига Трампнинг Истанбулга сафари, агар Путин Украина бўйича музокараларда иштирок этишга қарор қилса, амалга ошиши мумкинлигини айтган.

Истанбулда Россия ва Украина музокаралари

Путиннинг ўзи 15 май куни Украина томонидан Европа Иттифоқи ва АҚШ кўмагида таклиф қилинган 30 кунлик сулҳга муқобил равишда Истанбулда тўғридан тўғри музокараларни қайта бошлаш ғояси билан чиқди. Бунга жавобан Зеленский Туркияга келишини, фақат Россия раҳбари билан шахсан учрашишини айтди.

Кремль ҳозирча музокараларда Россиядан ким вакиллик қилишини ва Путин иштирок этиши мумкинлигини эълон қилгани йўқ.

Россия Президенти матбуот котиби Дмитрий Песковнинг сўзларига кўра, Россия Украина билан музокараларга тайёргарлик кўришда давом этмоқда.