Трамп Россия иқтисодиёти оғир аҳволда эканини айтди

АҚШ Президенти Дональд Трамп Россия иқтисодиёти Украинадаги уруш туфайли оғир аҳволда эканини айтди. Бу ҳақда Оқ уй раҳбари кеча, 25 сентябрь куни журналистлар билан ўтказган мулоқотида сўз очди.

Унинг сўзларига кўра, Москва “ҳаммасини хавф остига қўйган” ва иқтисодиёт “катта муаммоларга учраяпти”.

Бу Трампнинг биринчи баёноти эмас, у яқинда БМТ Бош Ассамблеяси доирасида Зеленский билан учрашувдан кейин ҳам Россия иқтисодиётини “даҳшатли аҳволда” деб атаган эди.

Россия Президенти Владимир Путин эса бунинг аксини таъкидлаб, мамлакат иқтисодиёти ҳали рецессиядан йироқ, саноат, қишлоқ хўжалиги, рақамли технологиялар ва хизмат кўрсатиш соҳаларида ўсиш борлигини айтган.

Кремль вакили Юрий Ушаков Трампнинг кескин гапларини “суҳбатдошларига ёқишга қаратилган риторика” деб баҳолаган ва вазият анча мураккаб эканини қўшимча қилган.

Шунингдек, Трамп Россияга қарши “жуда жиддий бож тўловлари пакети” билан таҳдид қилган. Москва эса Ғарб санкцияларини ноқонуний деб ҳисоблаб, иқтисодиёт маълум даражада уларга “иммунитет ҳосил қилганини” айтмоқда.

Эслатиб ўтамиз, аввалроқ Европа Комиссияси Россия гази ва банкларига нисбатан янги чекловлар тўпламини имзолаганди.