Трамп Россия билан Украина бўйича “жуда жиддий” музокара ўтказаётганини айтди

АҚШ Президенти Дональд Трамп Вашингтон Россия билан Украина можаросини тугатиш бўйича “жуда жиддий” музокаралар олиб бораётганини маълум қилди ва Россия Президенти Владимир Путин билан гаплашмоқчи эканини айтди. Бу ҳақда у кеча, 31 январь куни Оқ уйда журналистлар билан суҳбатда сўз очди.

“Биз гаплашамиз ва эҳтимол жуда муҳим бир нарсани амалга оширамиз. Биз бу урушни тугатишни истаймиз. Агар мен (ўша пайтда) президент бўлганимда, бу уруш ҳеч қачон бошланмаган бўлар эди”, деди Трамп.

Унинг сўзларига кўра, АҚШ можарони тугатиш бўйича  “жуда жиддий” муҳокамалар олиб бормоқда. Шунингдек, журналистлар ундан бу муҳокамалар Россия билан бўлаётганми деб сўраганда, “ҳа, Россия билан”, дея жавоб берган Трамп.

Олдинроқ, 30 январь куни Россия Президенти матбуот котиби Дмитрий Песков Владимир Путин ва Дональд Трамп ҳали суҳбатлашмаганини айтганди. Шунингдек, Россия Ташқи ишлар вазири ўринбосари Сергей Рябков кеча, 31 январь куни музокаралар борасида ҳеч қандай силжиш йўқлигини маълум қилган.

Эслатиб ўтамиз, аввалроқ Владимир Путин Украина Президенти Владимир Зеленскийни мамлакатга қонуний раҳбар деб ҳисобламаслигини айтиб, у билан музокара ўтказишга рухсат берган эди. Шу билан бирга, Зеленский билан тинчлик шартномасини имзолаш имкониятини рад этганди.