Трамп Путин билан гаплашганини тасдиқлади

АҚШ Президенти Дональд Трамп Россия Президенти Владимир Путин билан Украина можаросини ҳал этиш масаласида телефон орқали суҳбатлашганини айтди. Шунингдек, у жанговар ҳаракатларни тез орада тўхтатишга умид билдирди. Бу ҳақда у “New York Post” нашрига берган интервьюсида сўз очди.

“Мен яхшиси жим тураман”, деди Дональд Трамп Россия Президенти билан неча марта мулоқот қилгани ҳақидаги саволга жавобан.

Трампнинг сўзларига кўра, Владимир Путин одамлар ўлишдан тўхташини истайди. Шунингдек, АҚШ Президентининг айтишича, у можарони тўхтатиш бўйича аниқ режаларга эга.

“Умид қиламанки, бу тез ҳал бўлади. Ҳар куни одамлар ҳалок бўлмоқда. Мен бу лаънати нарсага якун ясашни истайман”, дейди Дональд Трамп.

У, шунингдек, миллий хавфсизлик бўйича ёрдамчиси Майк Уолцга учрашув ташкил қилиш ҳақида топшириқ берган. Бундан ташқари Трамп Украина Президенти Владимир Зеленский билан нодир металлар ва газга оид 500 миллион долларлик битим тузиш нияти борлигини айтган. Унга кўра, АҚШ бунга жавобан ҳар қандай потенциал тинчлик битими доирасида Украинага хавфсизлик кафолатларини тақдим этишга тайёр.

Эслатиб ўтамиз, аввалроқ Дональд Трамп Россия ва Украина расмийлари билан “жуда жиддий музокаралар” бўлиб ўтганини айтган эди. Ўша куни Россия Президенти матбуот котиби Дмитрий Песков Москва ва Вашингтон ўртасида Украина можароси бўйича алоҳида идоралар орқали алоқа давом этаётганини билдирган.