Трамп Оқ уй матбуот котиби этиб содиқ тарафдорини тайинлади

АҚШ Президенти Дональд Трамп ўзининг собиқ тарафдори Кети Захарияни Оқ уйнинг янги матбуот котиби этиб тайинлади. У жорий йилнинг август ойи охирида лавозимини тарк этган Керолин Ливиттнинг ўрнини эгаллайди. Бу ҳақда “The Guardian” хабар берди.

Қайд этилишича, Трамп кеча, 9 октябрь куни ўзининг Truth Social ижтимоий тармоғида Захарияни ушбу лавозимга тайинлаганини эълон қилган. Президент уни ўзининг “содиқ мухлиси” ва MAGA (Трамп тарафдорлари ҳаракати) ҳаракатининг тарафдори деб атаган.

“У бошиданоқ содиқ ва ажойиб тарафдор бўлиб келган. Шунингдек, у MAGA ҳаракатининг ашаддий мухлиси ва аъзоси”, деб ёзган Трамп.

Нашрга кўра, Захариянинг тайинланиши Вашингтонда кутилмаган қарор бўлган. Аввалроқ консерватив телебошловчи Скотт Женнингс ушбу лавозимга асосий номзодлардан бири сифатида кўрилаётганди. Бироқ унинг илгари Трампни танқид қилгани тайинловга тўсқинлик қилиши мумкинлиги айтилган.

Кети Захария аввал АҚШ Ички хавфсизлик вазирлигида матбуот котиби бўлиб ишлаган. Ҳозирда эса Трампга тегишли Truth Social ижтимоий тармоғига эгалик қилувчи Trump Media and Technology Group компаниясида коммуникациялар бўйича маслаҳатчи лавозимида фаолият юритади.

Калифорнияда туғилган Захария кўп йиллардан бери Республикачилар партияси сиёсатида фаол иштирок этиб келади. У Пеппердайн университетида таҳсил олган, университетдаги Республикачилар талабалар ташкилотига раҳбарлик қилган. Шунингдек, Жорж Буш президентлигининг иккинчи муддати давомида Оқ уйнинг сиёсий масалалар бўйича идорасида ва Республикачилар миллий қўмитасида амалиёт ўтаган.

Трамп Захария ОАВ вакиллари, Америка халқи ва унинг маъмурияти билан самарали ишлашига ишонч билдирган.

“Кети кейинги Оқ уй матбуот котиби сифатида мамлакатимиз учун катта натижаларга эришишига ишонаман. У ОАВ вакиллари, Америка халқи ва менинг маъмуриятим ҳурматига сазовор бўлади ҳамда улар билан аъло даражада ишлайди”, деб ёзган Трамп.

Маълумот учун, Кети Захария кинопродюсер Тайлер Захарияга турмушга чиққан. Уларнинг тўрт нафар фарзанди бор.

Эслатиб ўтамиз, аввалроқ АҚШ Президенти Дональд Трамп унинг матбуот котиби Каролин Ливитт август ойи охирида Оқ уйни тарк этишини маълум қилганди. Ливиттнинг ўзи бу қарорни “аччиқ-ширин қарор” деб атаган.