Трамп НАТО учун сарфлаётган маблағларини беъманилик деб атади

АҚШ НАТОга Россиядан ҳимояланишда ёрдам бериш учун “триллионлаб доллар” сармоя киритди ва бу “бироз беъманилик”. Бу ҳақда кеча, 12 апрель куни АҚШ Президенти Дональд Трамп журналистлар билан суҳбатда сўз очди.

“Биласизми, биз НАТОга Россиядан ҳимояланишга ёрдам бериш учун триллионлаб доллар сарфладик! Ўйлаб кўрсангиз, биз Россиядан ҳимояланяпмиз. Мен анчадан бери буни бироз беъманилик деб ҳисоблайман”, дейди республикачи етакчи.

Унинг сўзларига кўра, АҚШнинг НАТО учун қилаётган кўп миллионли харажатлари “жиддий таҳлил” қилинади.

Эслатиб ўтамиз, жорий йил апрель ойи бошида Трамп АҚШнинг НАТОдан чиқиши ҳақида жиддий ўйлаётганини айтган эди, чунки альянс давлатлари Эронга қарши урушга қўшилмади. Бундан аввал у, агар аъзо давлатлар Ҳормуз бўғозини қамалдан чиқаришда АҚШга ёрдам беришдан бош тортса, НАТОни “жуда ёмон келажак” кутаётганини ваъда қилган эди.

“Politico” нашрининг хабар беришича, жорий йилнинг 8 апрель куни НАТО Бош котиби Марк Рютте билан ёпиқ учрашувда Трамп альянс аъзоларининг Эрондаги операцияда қатнашишдан бош тортганидан норозилигини билдирган ва жавоб чораларини кўраётганига шаъма қилган. Мулозимлардан бири нашрга учрашув “кўнгилсиз якунланганини” айтиб, суҳбатни “ҳақоратлар оқими” деб атаган ва Трамп “деярли ҳар қандай чорани қўллаш билан таҳдид қилганини” қўшимча қилган.

“Bloomberg” манбаларига таяниб ёзишича, Европа давлатлари Рюттенинг Эрон билан урушда АҚШни сўзсиз қўллаб-қувватлаётганидан норози. Нашр суҳбатдошларининг фикрича, бу НАТО бирлигига путур етказади ва АҚШ Президентида нотўғри умидлар уйғотади.