Трамп Мадуро билан гаплашиб олмоқчи

АҚШ Президенти Дональд Трамп Венесуэла Президенти Николас Мадуро билан гаплашишни режалаштирмоқда. Бу ҳақда ўз манбаларига таяниб, “Axios” хабар берди.

Маълум қилинишича, Трамп ўз маслаҳатчиларига Мадуро билан гаплашиш нияти борлигини айтган, аммо суҳбат санаси ҳали белгиланмаган. Бу қарор АҚШнинг яқин кунларда Венесуэлага ракета зарбалари ёки қуруқликдаги кенг кўламли ҳарбий амалиёт бошлаши шарт эмаслигини кўрсатиши мумкин. 

Маълумотларга кўра, ҳозирча Венесуэлага кириб бориш ёки Мадурони қўлга олиш каби режалар кун тартибида йўқ, бироқ бундай имконият бутунлай истисно қилинмайди.

Ҳозир АҚШнинг асосий ҳаракатлари наркотрафикни тўхтатишга қаратилган бўлиб, шу мақсадда Пентагон 14 ноябрда эълон қилган “Жанубий найза” операцияси доирасида Венесуэла соҳиллари яқинида наркотик ташувчи кемаларга зарбалар бериб келмоқда. 

“Reuters” нашрига кўра, АҚШ Венесуэлага қарши янги босқичдаги амалиётларни яқин кунларда бошлаши мумкин. “Fox News” ҳам Вашингтоннинг яширин операциялари тез орада фаоллашиши ҳақида маълумот берган. Ҳудудда хавфсизлик масаласи кескинлашгани сабабли АҚШ ҳаво қатнови бўйича огоҳлантириш чиқарган ва бир қатор авиакомпаниялар Венесуэла ҳудуди яқинидаги парвозларни вақтинча тўхтатган. 

“Axios” манбаси АҚШнинг Венесуэлада яширин операциялар олиб бораётганини тасдиқлаган, аммо улар Мадурони ўлдиришга эмас, наркотрафикни тўхтатишга қаратилганини таъкидлаган. Шунга қарамай, агар Мадуро ҳокимиятдан кетса, бу АҚШ учун умуман муаммо бўлмаслигини айтилган. Венесуэла эса АҚШни наркотрафик мавзусини баҳона қилиб, ҳарбий можарони бошлаб юборишга уринаётганликда айблаган, Мадуро Трампни уруш бошламасликка чақирган. 

“Politico” манбалари Вашингтонда Мадурони сургун қилиш, уни АҚШда судга тортиш ёки бошқа вариантлар борасида турли сценарийлар муҳокама қилинаётганини, сургун учун истиқбол сифатида Туркия, Россия, Озарбайжон ёки Куба тилга олинаётганини билдирган.

Эслатиб ўтамиз, ушбу вазият фонида Мадуро Путиндан ёрдам сўраб хат йўллагани ҳақида хабар берилганди. Хатда Венесуэла етакчиси Россиядан мамлакатга ракеталар ва маблағ беришни, шунингдек, самолётларни таъмирлашни сўраган. Кейинроқ эса “Politico” ўз манбаларига таяниб, АҚШ Венесуэла Президенти Николас Мадурони Россияга қочишга мажбур қилиши мумкинлиги ҳақида ёзди.