АҚШ Мадурони Россияга “сургун” қилмоқчи – ОАВ

north_east

“Тинчликсевар” Трамп ёхуд қора олтин васвасаси

АҚШ Венесуэла Президенти Николас Мадурони Россияга қочишга мажбур қилиши мумкин. Бу ҳақда ўз манбаларига таяниб, “Politico” хабар берди.

Нашрнинг ёзишича, АҚШ Президенти Дональд Трамп маъмурияти Николас Мадуро ҳокимиятдан кетиши ва мамлакатни тарк этиши мумкин бўлган сценарийни муҳокама қилмоқда. Оқ уй амалдорларининг айтишича, унга Россияга ихтиёрий сургун сифатида боришга “яшил чироқ” берилиши эҳтимоли кўрилмоқда. Шунингдек, Туркия ёки Куба вариантлари ҳам кўриб чиқилмоқда. Бироқ АҚШ Президентининг айрим маслаҳатчилари Мадурога мамлакатдан чиқиб кетишга рухсат бериш ўрнига уни қўлга олиш ва АҚШда суд қилиш тарафдори.

“The Atlantic” манбаларига кўра, Венесуэла ҳамда АҚШ вакиллари билан музокараларда Мадуро амнистия, уни топганлар учун мукофотни бекор қилиш ва ўзи ҳамда атрофидагилар учун кафолатли, қулай сургун таклиф этилса, истеъфога тайёр эканини билдирган. Бунгача эса Дональд Трамп Мадуро билан музокара ўтказишга тайёрлигини айтган, бироқ учрашув вақти ҳамда формати очиқланмаган.

Бу орада АҚШ Мудофаа вазири Пит Ҳегсет Ғарбий яримшарда “наркотеррорчилар”га қарши “Southern Spear” ҳарбий операцияси бошланганини эълон қилган. Унинг доирасида АҚШ Ҳарбий-денгиз кучларининг энг йирик авиация зарба гуруҳи – USS Gerald R. Ford авиаташувчи кемаси бошчилигидаги гуруҳ Кариб денгизига кирган. Кема бортида 4 мингдан ортиқ ҳарбий хизматчи, ўнлаб жанговар қирувчи самолётлар ва вертолётлар жойлашган.

Ҳарбий босим кучайган бир пайтда Мадуро оммага мурожаат қилиб, Трампни қуролли можаро бошламасликка чақирди. “Reuters” хабарига кўра, ўтган ҳафта Трамп маъмурияти Оқ уйда учта учрашув ўтказиб, Венесуэлага қарши эҳтимолий ҳарбий операция вариантларини, жумладан, ҳудудга зарбалар бериш сценарийларини муҳокама қилган.

Маълумот учун, агар Мадуро Россияга борадиган бўлса, Москвадан бошпана сўраган собиқ давлат раҳбарлари қаторига қўшилади. 2014 йилда Украина “инқилобидан” сўнг Виктор Янукович Россияга қочиб, Рубловкада яшай бошлаган. 2024 йил охирида эса Сурия собиқ президенти Башар Асад Дамашқнинг мухолифат қўлига ўтиши ортидан ҳокимиятни йўқотиб, Россияга кўчиб борган.

АҚШ билан кескинлик ортишидан бироз олдин Мадуро Россия билан стратегик ҳамкорлик тўғрисидаги шартномани имзолаган. Бу ҳужжат президент Владимир Путиннинг туғилган куни – 7 октябрда имзоланган бўлиб, унда глобал ва минтақавий хавфсизлик масалалари ҳам қамраб олинган.