Трамп инаугурация маросимини Капитолий ичкарисига кўчирди

2025 йил 20 январда Дональд Трампнинг инаугурацияси Вашингтондаги Капитолий биноси ташқарисида эмас, ичида бўлиб ўтади. Бу ҳақда республикачининг ўзи 17 январь куни TruthSocial ижтимоий тармоғида ёзган.

Трампнинг айтишича, АҚШ пойтахтида 20 январь куни совуқ Арктика шамоллари ва “рекорд даражада паст ҳарорат” кузатилиши кутилмоқда. Метеорология хизмати маълумотларига кўра, душанба куни Вашингтонда ҳаво ҳарорати кундузи -5°С, кечаси эса -12°С гача тушиши кутилмоқда. Республикачининг фикрича, бу минглаб фавқулодда вазиятлар ходимлари ва маросим томошабинлари учун хавфли бўлиши мумкин.

"Мен одамларнинг ҳеч қандай зарар кўришини ёки жароҳатланишини хоҳламайман. Шунинг учун мен инаугурация нутқи, шунингдек, ибодатлар ва бошқа нутқларни Капитолий Ротундада айтишни буюрдим", деб ёзган сайланган президент.

Дональд Трамп “Capital One Arena”да томошабинлар учун маросимнинг жонли эфири ташкил этилишини қайд этди. Трампнинг ўзи ўз тарафдорларини кутиб олиш учун лавозимга киришгач, у ерга келишга ваъда берган.

Вашингтондаги Миллий аллейида маросим ўтказилиши режалаштирилган Капитолий зинапояси олдида аллақачон минглаб стуллар ўрнатилган. Энди улар керак бўлмайди. Капитолий ротундадаги залнинг ўзи бир неча юз кишини сиғдира олади.

Одатда АҚШ президентининг инаугурация маросими Капитолий биноси олдидаги кўчада бўлиб ўтади. Масалан, Трамп 2017 йил 20 январда лавозимга киришганида ҳам шундай бўлган. Республикачининг ўзи эслаганидек, 1985 йилда Рональд Рейганнинг инаугурацияси пайтида совуқ об-ҳаво туфайли маросим Капитолий ротундасига кўчирилган эди.

Маълумот учун, АҚШнинг тўққизинчи президенти Уильям Генри Харрисон 1841 йилда инаугурация маросимида ёмон об-ҳавога эътибор бермай, шляпа ёки пальтосиз шамолда туриб узоқ нутқ сўзлаган. Бир ой ўтгач, 68 ёшли сиёсатчи пневмониядан вафот этган.