Трамп илк хорижий сафарида дафн маросимига боради

АҚШ Президенти Дональд Трамп кеча, 21 апрель куни вафот этган Рим папаси Франциск билан видолашув маросимида иштирок этади. Бу ҳақда давлат раҳбари Truth Social ижтимоий тармоғида маълум қилди.

Трамп 20 январда бошланган иккинчи муддатининг биринчи чет эл сафари доирасида дафн маросимида қатнашиб, понтифик хотирасини шахсан улуғлашини тасдиқлади.

Маросимда Президентга рафиқаси Мелания Трамп ҳамроҳлик қилади.

“Мелания ва мен Римга, Папа Францискнинг дафн маросимига борамиз. У ерда бўлишни интиқлик билан кутяпмиз!” деб ёзган Трамп.

Бироқ, унинг “интиқлик билан кутамиз” жумласи  ижтимоий тармоқ фойдаланувчилари ва Демократик партиянинг баъзи аъзолари томонидан мотам тадбири контекстида ноўрин деб ҳисобламоқда ва танқидларга сабаб бўлмоқда.

Эслатиб ўтамиз, олдинроқ Рим папаси Францискнинг ўлимига инсульт сабаб бўлгани айтилганди. Ватикан томонидан эълон қилинган ўлим гувоҳномасида қайд этилишича, инсульт оғир ва қайтариб бўлмайдиган юрак етишмовчилигига олиб келган. Тиббий хулосага кўра, Франциск мультимикробиял икки томонлама пневмония, кўп бронхоэктазия, юқори қон босими ва II турдаги диабет туфайли келиб чиққан ўткир нафас етишмовчилигидан азият чеккан.