Трамп Финляндия Президентини ҳам Тинчлик кенгашига таклиф қилди

АҚШ Президенти Дональд Трамп Финляндия Президенти Александр Стуббни Ғазо бўйича тинчлик кенгашига киришга таклиф қилди. Бу ҳақда “Helsingin Sanomat” газетаси Стубб идорасига таяниб хабар берди.  

“Баъзи жаҳон етакчилари ҳам Кенгашга таклиф қилинганликларини айтишди. Улар орасида Туркия Президенти Ражаб Тойиб Эрдўған, Миср Президенти Абдулфаттоҳ ас-Сиси, Аргентина Президенти Хавьер Милей ва Канада Бош вазири Марк Карни, Европа комиссияси раҳбари Урсула фон дер Ляйен бор”, деб ёзмоқда. 

Кенгашга Россия Президенти Владимир Путин ҳам таклиф қилинган, Кремль бу таклифни ўрганмоқда. 

Марказий Осиё давлатларидан эса Қозоғистон Президенти Қосим-Жомарт Тўқаев ва Ўзбекистон Республикаси Президенти Шавкат Мирзиёев ҳам худди шундай таклифни қабул қилди.

Эслатиб ўтамиз, АҚШ Президенти Дональд Трамп жорий йил 16 январда Ғазо секторида Тинчлик кенгаши тузилишини эълон қилган эди. Ушбу тузилмани ташкил этиш Трампнинг Ғазо бўйича тинчлик режасининг бир қисми бўлиб, унда халқаро кучларни жойлаштириш ҳам назарда тутилган. Бирлашманинг ижроия қўмитаси таркибига АҚШ Давлат котиби Марко Рубио, Трампнинг махсус вакили Стив Уиткофф, Президентнинг куёви Жаред Кушнер ҳамда Буюк Британиянинг собиқ бош вазири Тони Блэр киради.

“Bloomberg” маълумотларига кўра, АҚШ Ғазо сектори бўйича халқаро Тинчлик кенгашида доимий ўрин олишни истаган давлатлардан камида 1 миллиард АҚШ доллари бадал киритишни сўрамоқда. Ижроия кенгашининг биринчи раиси Трампнинг ўзи бўлиб, ташкилот аъзолигига кимни қабул қилиш масаласини айнан у ҳал қилади. Тинчлик кенгашига аъзо бўлган ҳар бир давлат уч йилдан ортиқ бўлмаган муддатга тайинланади ва битта овозга эга бўлади. Кенгаш қарорлари кўпчилик овоз билан қабул қилинади, бироқ уларнинг барчаси раис – Трамп томонидан тасдиқланиши шарт.