Трамп Эронга қарши урушда ғалаба қозонганини айтди

АҚШ Президенти Дональд Трамп АҚШ Эронга қарши урушда биринчи соатнинг ўзида ғалаба қозонганини айтди. Бу ҳақда Оқ уй раҳбари Кентукки штатидаги Хеброн шаҳрида ўтказилган митингда айтиб ўтди.

“Биз ғалаба қозондик. Биринчи соатнинг ўзида ҳаммаси тугади”, деган Трамп.

Унинг сўзларига кўра, ҳарбий операция давомида АҚШ қўшинлари Эроннинг 58 та ҳарбий кемасини йўқ қилган ва Ислом Республикасининг ҳарбий имкониятларига жиддий зарба берган.

Шу билан бирга, Дональд Трамп Вашингтон можарони ҳозирча тугатиш ниятида эмаслигини таъкидлаган.

“Биз жуда эрта кетишни истамаймиз. Бу ишни охиригача етказишимиз керак”, деган Трамп.

Президентнинг айтишича, АҚШ ҳар икки йилда шундай вазиятга қайтиб қолишни истамайди.

Аввалроқ, “Axios” нашрига берган интервьюсида Дональд Трамп уруш яқин вақтда якунланиши мумкинлигини айтган. Унинг таъкидлашича, Эронда муҳим нишонлар деярли қолмаган ва АҚШ ҳамда Исроил режалаштирилгандан тезроқ катта зарар етказган.

Бироқ, америкалик ва исроиллик манбаларга кўра, икки давлат Эронга қарши ҳужумларни камида яна икки ҳафта давом эттиришни режалаштирмоқда.

Дональд Трамп Ҳормуз бўғози орқали нефть ташиш тўсиб қўйилса, можаро янада кескинлашиши мумкинлигини ҳам айтган эди. Эрон кучлари айрим кемалар ҳаракатига тўсқинлик қилиб, уларга ҳужумлар уюштирмоқда, бу эса энергия нархларининг ўсишига сабаб бўлмоқда.

Нефть нархининг кескин қимматлашиши АҚШ ҳукумати учун 3–4 ҳафта ичида жиддий сиёсий муаммога айланиши мумкин.

“Financial Times” маълумотига кўра, 2026 йилда АҚШнинг тўртта энг йирик авиакомпанияси авиақувват нархи қимматлашиши сабабли 11 миллиард доллардан ортиқ қўшимча харажат қилиши мумкин.