Трамп Эронга қарши операция қачон тўхтатилишини айтди

АҚШ Президенти Дональд Трамп Эронга қарши ҳарбий операцияни қачон тугатиш ҳақидаги қарор АҚШ ва Исроил томонидан биргаликда қабул қилинишини маълум қилди. Бу ҳақда у “The Times of Israel” нашрига берган интервьюсида сўз очди.

АҚШ Президентининг айтишича, бу қарор Исроил Бош вазири Биньямин Нетаньяху билан келишилган ҳолда қабул қилинади.

“Менимча, бу ўзаро қарор бўлади. Биз бу ҳақда гаплашганмиз. Мен тўғри вақтда қарор қабул қиламан, аммо барча омиллар ҳисобга олинади”, деган Трамп. 

Журналистлар Исроил АҚШ зарбаларни тўхтатганидан кейин ҳам Эронга қарши урушни давом эттириши мумкинми, деган саволни берганида, Трамп бундай эҳтимолни кўриб чиқмаётганини билдирган.

Шунингдек, у Эрон Ислом Республикаси Исроилни йўқ қилишни режалаштирганини айтган. Трампнинг сўзларига кўра, агар у ва Биньямин Нетаньяху операцияни бошламаганида, Эрон Исроилга жиддий таҳдид солиши мумкин эди.

“Эрон Исроилни ва унинг атрофидаги барча нарсаларни йўқ қилишни режалаштираётган эди. Биз биргаликда ишладик. Исроилни йўқ қилишни истаган давлатни йўқ қилдик”. деган Оқ уй раҳбари. 

Эслатиб ўтамиз, аввалроқ Эроннинг янги олий раҳбари этиб 56 ёшли Саййид Мужтабо Хоманаий тайинланганди.