Трамп бош-қош бўлган тинчлик келишуви бекор қилинди

Кеча, 10 ноябрь куни Таиланд ва Камбоджа ўртасидаги умумий чегарада миналар портлаши оқибатида аскарлар жароҳатлангач, бугун, 11 ноябрь куни икки давлат ўртасидаги тинчлик келишуви тўхтатилди. Бу ҳақда Таиланд Бош вазири Анутхин Чанвиракун баёнот эълон қилди.

Маълум бўлишича, Таиланд Камбоджа билан тузилган Куала-Лумпур тинчлик келишувини тўхтатмоқда. Ушбу келишув қуролсизланиш чораларини кўришни ва икки давлат ўртасидаги муносабатларни нормаллаштиришни кўзда тутарди.

“Bloomberg” нашрининг ёзишича, Таиланд, шунингдек, тинчлик келишувига кўра жорий йилнинг 21 ноябрида озод қилиниши керак бўлган 18 нафар Камбоджа аскарини ҳам озод этиш жараёнини тўхтатади.

“Таиланд армиясига кўра, Си Са Кет вилоятида патруль пайтида аскарлар яқинда ўрнатилган минани устидан босиб ўтган. Бу сўнгги тўрт ой ичида еттинчи шундай портлашдир”, дейилади хабарда.

Айни пайтда Камбоджа Мудофаа вазирлиги вакиллари ОАВ сўровларига изоҳ бермаган.

Эслатиб ўтамиз, жорий йилнинг 25 октябрь куни Таиланд ва Камбоджа раҳбарлари можарони ҳал этиш бўйича декларацияни имзолаган эди. АҚШ Президенти Дональд Трамп ҳам ҳужжатни имзолаш маросимида иштирок этган.

Бундан аввал, яъни 24 июль куни икки мамлакат ҳарбийлари ўртасида тўқнашувлар бўлганди. Ҳаммаси чегарадаги баҳсли ҳудудда қуруқликдаги қўшинлар ўртасидаги отишма билан бошланган. Орадан бир неча кун ўтиб, Таиланд ва Камбоджа ўт очишни тўхтатиш ҳақида келишувга эришган. Шундан сўнг, Трамп Таиланд ва Камбоджа раҳбарлари билан суҳбатдан кейин ўзини “тинчлик Президенти” деб атаб, олти ой ичида дунёдаги кўплаб урушларга барҳам берганини айтган эди.