Трамп Ҳормузни “Трамп бўғози” деб ўзгартирмоқчи

АҚШ Президенти Дональд Трамп Truth Social ижтимоий тармоғида Ҳормуз бўғозини “Трамп бўғози” деб номланган расмни жойлаштирди.

Март ойининг охирида Маямида ўтказилган инвестиция форумида Трамп ҳазил тариқасида Ҳормуз бўғозини ўз номи билан атаб, “улар Трамп бўғозини очишга мажбур бўлади”, деган эди ва бундай баёнотлар тасодифий эмаслигини қўшимча қилган. Орадан кўп ўтмай “New York Post” манбаларга таяниб, Трамп Ҳормуз бўғозини “Америка бўғози” деб қайта номлаш имкониятини кўриб чиқаётганини хабар қилган.

Оқ уйга қайтганидан сўнг, Трамп муҳим объектларни ўз номи билан қайта номлаш ташаббусларини фаол илгари сурмоқда. Хусусан, 2025 йилда Америка Тинчлик институтини “Трамп номидаги Америка тинчлик институти” деб қайта номланган.

Бундан ташқари, у географик объектлар номини ўзгартириш ташаббуслари билан ҳам чиққан. 2025 йил январь ойида у Мексика қўлтиғини “Америка қўлтиғи”, Денали тоғини эса “Мак-Кинли” деб қайта номлашни буюрган. Мексика томонида бу қарорлар танқид қилиниб, “Мексика қўлтиғи” номи асрлар давомида халқаро навигацияда қўлланиб келаётгани таъкидланган.

28 февраль куни АҚШ ва Исроилнинг Эронга қарши операцияси бошланганидан сўнг, Теҳрон Ҳормуз бўғозини блокада қилишини эълон қилган. Апрель ўрталарида музокаралар муваффақиятсиз якунлангач, Трамп АҚШ томонидан ҳарбий блокада жорий этилишини маълум қилган. Унинг айтишича, бу чоралар Эроннинг нефть экспортини тўхтатиш ва Теҳронга босимни кучайтиришга қаратилган.

АҚШ, шунингдек, бўғоздан ўтиш учун Эронга ҳақ тўлаган деб гумон қилинган кемаларни ушлаб қолишни бошлаган. Оқибатда, бўғоз орқали кема қатнови деярли тўхтаб қолган.

Эслатиб ўтамиз, аввалроқ АҚШ Президенти Дональд Трамп ўз ёрдамчиларига Эронга қарши узоқ муддатли блокадага тайёргарлик кўришни буюрганди.