“Товуқхонада иккита хўроз бўлмайди”. Лапорта Мбаппе ҳақида гапирди

“Барселона” президенти Жоан Лапорта “Реал Мадрид” ҳужумчиси Килиан Мбаппенинг жамоага таъсири ҳақида фикр билдирди. Унинг айтишича, жамоада юлдуз футболчиларнинг кўплиги ҳар доим ҳам муваффақиятни кафолатламайди. Бу ҳақда Лапорта “L’Équipe” нашрига берган интервьюсида сўз очди.

Лапортанинг билдиришича, жамоада бир нечта етакчи футболчининг бўлиши ҳар доим ҳам самара бермайди.

“Мен бу ҳақда аввал ҳам айтганман. Товуқхонада биттадан ортиқ хўроз бўлиши мумкин эмас. Бу ҳеч қачон иш бермайди! Футболда энг муҳими – жамоа ва жамоавий руҳ. Буларсиз ҳеч қандай лойиҳа муваффақиятли бўлмайди”, дейди “Барселона” президенти.

Лапорта “Барселона”нинг кучли жиҳатларидан бири сифатида иқтидорли футболчилар, “Ла Масия” тарбияланувчилари ва турли футбол маданиятларидан келган ўйинчиларни бир жамоага бирлаштира олганини қайд этган.

“Барселона”нинг кучли жиҳатларидан бири бизда ажойиб иқтидорлар, “Ла Масия” тарбияланувчилари ва турли футбол маданиятларидан келган ўйинчилар бор. Шунга қарамай, биз ўзаро ажойиб ҳамжиҳатликка эга жамоа тузишга муваффақ бўлдик. Бунга жамоани ривожлантириш устида ишлаётган ажойиб мураббий ва спорт директори туфайли эришдик. Бошқа томондан, “Реал Мадрид” йирик трансферларни амалга ошириш ва юлдуз футболчиларни сотиб олиш йўлини танлади”, дейди Лапорта.

Маълумот учун, Килиан Мбаппе 2024 йилнинг ёзидан буён “Реал Мадрид” сафида тўп сурмоқда. Франциялик ҳужумчи бунга қадар “Монако” ва “Пари Сен-Жермен” клубларида ўйнаган.

Эслатиб ўтамиз, аввалроқ Килиан Мбаппе жамоадан норози эканлиги ва 2027 йилда клубини ўзгартириши мумкинлиги ҳақида хабар берилганди.