Тошкентдаги уйлардан бири ярим тунда ёниб кетди

Кеча, 6 июнь куни Тошкент шаҳрида жойлашган кўп қаватли уйларнинг бирида ёнғин содир бўлди. Бу ҳақда пойтахт Фавқулодда вазиятлар бошқармаси хабар берди. 

Маълум қилинишича, соат 23:48 да Бектемир туманининг “Иқбол” МФЙ ҳудудида жойлашган кўп қаватли уйларнинг бирида – 11-қаватда жойлашган хонадонда ёнғин содир бўлаётгани тўғрисида бошқармага хабар келиб тушган. 

Шунга кўра, ёнғин-қутқарув экипажлари айтилган манзилга соат 23:53 да етиб бориб, ёнғин соат 00:22 да ўчирилган.

Айтилган манзилда кўп қаватли уйнинг 11-қаватида жойлашган хонадонда уй жиҳозлари ёниб зарарлангани аниқланган.

Ёнғин оқибатида жабрланганлар йўқ. Ҳозирда ёнғин сабаби ва келтирилган моддий зарар аниқланмоқда.

Эслатиб ўтамиз, кеча, 6 июнь куни Тошкент шаҳрининг Сергели туманидаги мебель тайёрлаш цехида ёнғин юз берганди. Ёнғин-қутқарув экипажлари соат 08:07 да ҳодиса жойига етиб бориб, ёнғин соат 08:42 да қуршаб олинган ва нақ 2,5 соатда – соат 10:23 да ўчирилган.