Тошкентдаги мактаблардан бирида жанжал юз берди (видео)

Ижтимоий тармоқларда Тошкент шаҳри Яккасарой туманидаги 160-сонли мактабда ўқитувчилар ва директорга асоссиз айбловлар қўйилгани айтилган видеолар тарқалди. Ҳолат юзасидан шаҳар Мактабгача ва мактаб таълими бошқармаси муносабат билдирди.

Маълум қилинишича, сўнгги пайтларда 160-сонли умумтаълим мактаби маъмурияти фаолияти юзасидан эътироз ва шикоятлар кўпайган. Шу шикоятлар бўйича Тошкент шаҳар ҳамда Яккасарой тумани прокуратураси томонидан ўрганишлар олиб борилди. Ўрганиш ва суриштирув бўйича тегишли ҳужжатлар якуний хулоса учун ҳуқуқ-тартибот идораларига тақдим этилган.

“Видеолавҳада акс этган ҳолатнинг мактаб маъмурияти ва ўқитувчиларига умуман алоқаси йўқлигини маълум қиламиз. Унда ўқувчининг бувиси ҳамда ўқитувчи ўртасидаги мулоқот акс этган, холос”, дейилади бу ҳақдаги муносабатда.  

Ҳозирда Тошкент шаҳар мактабгача ва мактаб таълими бошқармаси 160-мактабдаги вазиятни тўлиқ ўз назоратига олган.

Эслатиб ўтамиз, аввалроқ Тошкент шаҳри Яшнобод туманидаги 149-мактаб ўқитувчилари мажбурий меҳнатга жалб қилингани ҳақида хабар бергандик.