Тошкентда тиш шифокори 17 яшар қизга шаҳвоний шилқимлик қилди

Тошкент шаҳар Учтепа туманидаги клиникалардан бирида 26 ёшли тиш шифокори қабулига келган 2008 йилда туғилган қизга шаҳвоний шилқимлик қилди. QALAMPIR.UZ суд ҳужжати билан танишди.

Ҳужжатда келтирилишича, жорий йилнинг 9 март куни Учтепа туманидаги клиникалардан бирида Ш.Ҳ. тишини даволатиш учун келган К.С. га нисбатан шаҳвоний шилқимлик қилган.

Кеча, 29 июль куни Жиноят ишлари бўйича Учтепа туман судида мазкур иш кўриб чиқилган. Судда Ш.Ҳ. айбига иқрор бўлган ва қилган ишидан пушаймонлигини билдириб, ўзига нисбатан енгиллик беришни сўраган. Жабрланувчи К.С. эса суддан Ш.Ҳ. га маъмурий қамоқ жазосини тайинлашни сўраб, кўрсатма берган.

Суд қарори билан Ш.Ҳ. Маъмурий жавобгарлик тўғрисидаги кодекснинг 41-1-моддасида (шаҳвоний шилқимлик қилиш) назарда тутилган ҳуқуқбузарликни содир қилган деб топилган ва унга нисбатан 3 сутка маъмурий қамоқ жазоси тайинланган.

Эслатиб ўтамиз, аввалроқ Тошкентнинг Бектемир туманида жойлашган хусусий клиника менежери беморга нисбатан шаҳвоний шилқимлик қилгани учун маъмурий жавобгарликка тортилганди.