Тошкентда 15-16 ёшдаги 7 нафар қизнинг ҳомиладор экани аниқланди

Жорий йилнинг январь-сентябрь ойларида Тошкент шаҳрида 15-16 ёшли қизлар ўртасида 7 та ҳомиладорлик ҳолати қайд этилди. Бу ҳақда халқ депутатлари Тошкент шаҳар Кенгашининг бугун, 13 ноябрдаги “Тошкент шаҳар Соғлиқни сақлаш бош бошқармаси томонидан аҳоли саломатлигини асраш, касалликларнинг олдини олиш ва уни профилактика қилишнинг ҳақиқий ҳолати, соғлом турмуш тарзини тарғиб қилиш ҳамда ушбу йўналишдаги фаолиятни яхшилаш борасида амалга оширилаётган ишларни ўрганиш ва натижасини муҳокама қилиш тўғрисида”ги қарорида келтирилган.

Ҳужжатга кўра, 2025 йилнинг январь–сентябрь ойларида ҳам мазкур ёш тоифасидаги қизлар ўртасида 7 та ҳомиладорлик ҳолати аниқланган. Ҳисобот даврида икки йилгача оралиқда туққан аёллар сони 2054 нафарни ташкил этган. Бу 2025 йилнинг шу давридаги 1921 нафар кўрсаткичдан 133 нафарга кўп. Тўртинчи ва бешинчи фарзандини туққан аёллар сони эса 3149 нафар бўлиб, ўтган йилга нисбатан 22 нафарга камайган.

Бундан ташқари, 35 ёшдан катта аёллар томонидан 2898 та туғруқ қайд этилган. Бу кўрсаткич 2025 йилнинг январь–сентябрь ойларида 2758 нафарни ташкил этган.

Пойтахтда жорий йилнинг дастлабки январь-сентябрь ойларида 41 993 нафар тирик чақалоқ туғилган. Бу ўтган йилнинг мос давридаги 47 703 нафар кўрсаткичдан 5710 нафарга кам.

Шунингдек, ҳисобот даврида оналар ўлими билан боғлиқ 5 та ҳолат қайд этилган. 2025 йилнинг мос даврида бу кўрсаткич 6 тани ташкил этган. Оналар ўлими коэффициенти ҳар 100 минг тирик туғилган чақалоққа нисбатан 11,9 дан 11,9 ни ташкил этган.

Шу билан бирга, ҳужжатда 15-16 ёшли қизлар ўртасида ҳомиладорлик ҳолатларининг олдини олиш бўйича таълим муассасалари, маҳаллалар ва оилалар билан профилактик ишларни ташкил этиш вазифаси белгиланган.

Эслатиб ўтамиз, аввалроқ Ўзбекистонда жорий йилнинг январь-сентябрь ойларида тирик туғилганлар сони 638,6 минг кишини ташкил этгани ҳақида хабар берилган эди.