Тошкентда 120 минг долларни қиморга тикиб юборганлар ушланди

Тошкент шаҳрида 120 минг АҚШ долларини интернет тармоқларидаги қимор ва таваккалчиликка асосланган ўйинга тикиб, талон-торож қилган шахслар фош этилди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.

Маълум бўлишича, департаментнинг Яшнобод тумани бўлими томонидан тижорат банкининг мурожаатига асосан ўтказилган терговга қадар текширувда Яшнобод банк филиалида бўлим бошлиғи вазифасида ишловчи Э.Н. “А.” МЧЖ масъул шахслари ва бошқалар билан ўзаро тил бириктириб, “Б.Б.” МЧЖга 120 минг АҚШ доллари кредит ажратилишига эришган. Кейинчалик сохта ҳужжатларни расмийлаштириш орқали кредит маблағини нақдлаштириб олиб, 120 минг АҚШ долларини интернет тармоқларидаги қимор ва таваккалчиликка асосланган ўйинларга ишлатиб, талон-торож қилгани аниқланган.

Ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари бошланган.

Эслатиб ўтамиз, аввалроқ Тошкентда эҳсон қутисини ўмариб кетган шахс ушлангани ҳақида хабар берилганди.

Алиқулов Жавоҳир