Тошкент ер усти метро линиясининг 5 та бекати ишга тушди

Тошкент ер усти ҳалқа метро йўлининг II босқичи доирасида қуриб битказилган бешта бекатда йўловчи ташувлари бошланди. Бу ҳақда Транспорт вазирлиги Матбуот хизмати хабар берди.

Таъкидланишича, Қўйлиқ–Қурувчилар участкасида қурилиш ишлари тугатилган бешта бекатнинг умумий узунлиги 7,74 километрни ташкил этади. Шундай қилиб, Тошкент метрополитенининг бекатлари сони 48 тага етган.

“Ер усти метроси қурилишининг иккинчи босқичи тўлиқ якунланиши билан Тошкент метрополитенининг жами узунлиги 70 километрдан зиёд, бекатлар сони 50 та бўлади”, дейилади хабарда.

Эслатиб ўтамиз, жорий йилнинг 8 февраль куни Шавкат Мирзиёев Тошкент ер усти метроси қурилишининг иккинчи босқичида амалга оширилаётган ишлар билан танишганди. Ҳозирда Тошкент ер усти метросининг биринчи босқичи ва Сергели йўналишини боғловчи Қўйлиқдан Сергелигача бўлган ер усти йўли барпо этилмоқда. Қарийб 12 километрлик бу қисмда 7 та бекат бўлади. Ҳозирда Қурувчилар даҳасигача борган 5 та бекат қуриб битказилган.