“Тошингни тер”. Лукашенко Трампнинг Беларусдан калий харидига фикр билдирди

АҚШ Беларусдан калийли ўғитлар харид қилиш бўйича “йирик келишув” устида ишламоқда. Бу ҳақда АҚШ Президенти Дональд Трамп кеча, 21 сентябрь куни Truth Social ижтимоий тармоғида ёзиб қолдирди.

“Бунинг нархи биз Канадага тўлаётган нархдан анча паст бўлади. Бу фермерларимиз ва чорвадорларимиз учун жуда яхши янгилик”, деб ёзган Трамп.

Бироқ Беларусь Президенти Александр Лукашенко Трампнинг баёнотидан бир неча соат олдин мамлакат Ғарб бозорларига калий етказиб бериш учун етарли ҳажмга эга эмаслигини айтган.

“Биз Шарққа қайта йўналтиришга муваффақ бўлдик. Бунга америкаликлар билан олиб бораётган музокараларимиз ҳам далил. Бу ерда кўп одамлар: “Вой, калийли ўғит!” деб бақиришмоқда. Агар биз бошқа бозорларга, Ғарб бозорларига етказиб беришни хоҳласак ҳам, бизда бундай ҳажм йўқ, ҳаммаси шартнома асосида банд қилинган”, деган Лукашенко.

Маълумотларга кўра, Беларусь Канада, Россия ва Хитой қаторида дунёдаги энг йирик калийли ўғит ишлаб чиқарувчилардан бири ҳисобланади. Бироқ мамлакатнинг Ғарб бозорларига калий етказиб бериш имконияти узоқ вақт давомида халқаро санкциялар билан чекланган.

Ушбу санкциялар 2020 йилда Беларусдаги намойишларнинг бостирилиши ва Лукашенко режимининг Россиянинг Украинага қарши урушидаги иштироки сабабли жорий этилган. Дональд Трамп АҚШ Президенти сифатида иккинчи муддатга қайтганидан кейин Вашингтон Лукашенко билан муносабатларни яхшилашга киришган. Шу жараёнда Беларуснинг калий саноатига нисбатан АҚШ санкциялари ҳам бекор қилинган. Шунга қарамай, Европа Иттифоқи Беларусь калийи импортига қўйилган чекловларни сақлаб қолмоқда.

АҚШ калийли ўғитларни асосан четдан сотиб олади. Мамлакат импорт қиладиган калийнинг қарийб 80 фоизини Канададан, яна 12 фоизини Россиядан олади. Ҳозир эса АҚШ Канада билан навбатдаги савдо можаросини бошдан кечирмоқда.

Эслатиб ўтамиз, аввалроқ АҚШ савдо музокаралари муваффақиятсиз якунланганидан сўнг Канаданинг айрим товарларига 50 фоизлик бож жорий қилганди. Бунга жавобан, Канада АҚШнинг янги божларига жавобан 700 га яқин турдаги Америка маҳсулотларига қўшимча бож жорий қилган.