TikTok АҚШда америкалик инвесторлар назоратига ўтди

TikTok АҚШда илованинг ишлашини давом эттиришга имкон берадиган Joint Venture LLC қўшма корхонасини ташкил этишни якунлади. Бу ҳақда “The Wall Street Journal” хабар берди.

Нашрнинг ёзишича, 2025 йил декабрь ойида имзоланган келишув шартларига кўра, илова янги бўлинма – Joint Venture LLC томонидан бошқарилади. Ушбу тузилма АҚШ расмийларига нисбатан дўстона муносабатда бўлган инвесторлар назоратида бўлади. Америкалик фойдаланувчиларга оид маълумотларни бошқариш ва алгоритмларни ўқитиш билан эса Oracle компанияси шуғулланади.

“Bloomberg” хабарига кўра, қўшма корхонада учта бошқарувчи инвестор бўлади: Oracle, хусусий инвестиция компанияси Silver Lake Management LLC ва Абу-Дабидаги MGX инвестиция жамғармаси. Ушбу учлик TikTok’нинг янги бўлинмасидаги акцияларнинг 50 фоизига эгалик қилади.

ByteDance’нинг (TikTok эгаси бўлган компанияси) амалдаги инвесторларига 30,1 фоиз, компаниянинг ўзига эса 19,9 фоиз улуш тегишли бўлади. TikTok бош директори Шоу Цзы Чу директорлар кенгашидан ўрин олади. Аввал операцион бўлимни бошқарган Адам Прессер эса эндиликда АҚШдаги бўлинмага бош директор сифатида раҳбарлик қилади.  

Эслатиб ўтамиз, аввалроқ АҚШ Президенти Дональд Трамп TikTok бўйича битимга оид фармонни имзолагани ҳақида хабар берилган эди.