Tesla сальто отадиган ғайриоддий спорткарни тақдим этди (видео)

Тошкент вақти билан бугун, 16 октябрь куни Tesla компанияси SpaceX двигателлари билан жиҳозланган янги тоифадаги Roadster электр спорткарини намойиш этди. Тақдимот Техасдаги синов полигонида бўлиб ўтди. Жараён компания сайтида жонли эфирга узатилди.

Учар автомобиллар узоқ вақт давомида илмий фантастика ва комиксларнинг бир қисми бўлиб келаётган эди, аммо энди бундай технологияни Илон Маск Техас штатининг Макгрегор шаҳрида тақдим этди. Компания баёнотига кўра, Roadster соатига 0 дан 100 километргача бўлган тезликни бир сониядан камроқ вақт ичида олади ва тўсиқлар устидан том маънода учиб ўтиб, уларни енгиб ўтишга қодир.

Компания томонидан X тармоғида эълон қилинган тасвирларда Roadster тўғридан тўғри кетма-кет тизиб қўйилган бешта автомобиль томон ҳаракатланади. Яқинлашиб қолган лаҳзада у кузов остида жойлашган пуркагичлар орқали сиқилган газни чиқаради, бунинг эвазига ҳавога кўтарилади, тўсиқ устидан учиб ўтади ва трюкни бажаради. Бироқ синов пайтидаги трюкларни бажариш вақтида автомобиль ичида ҳайдовчи бўлмаган.

Автомобиль Tesla ва SpaceX ҳамкорлигида ишлаб чиқилган. Сиқилган газда ишлайдиган ракета тезлаткичларидан ташқари, Roadster кузов остида вентиляторлар тизимини ҳам олган. У автомобилни йўлга босиб туриши ва қоплама билан ишқаланишни яхшилаши керак.

Маск, шунингдек, автомобилнинг серияли версияси бундан ҳам тезроқ бўлиши мумкинлигини айтган. Ишлаб чиқаришни бошлаш 2028 йилга режалаштирилган. Шу билан бирга, тадбиркор Roadster’дан фойдаланишга ҳамма мамлакатларда ҳам жамоат йўлларида рухсат берилмаслиги мумкинлигини билдирган.

У, шунингдек, автомобиль кўплаб мамлакатларда умумий фойдаланишдаги йўлларда юриш учун ноқонуний деб топилиши мумкинлигини ҳам айтиб ўтган.

Маълумот учун, янги Tesla Roadster концептини компания илк бор 2017 йилнинг ноябрь ойида кўрсатган. Дастлаб Tesla электр спорткарини етказиб беришни 2020 йилда бошлашни режалаштирган эди, бироқ муддат бир неча бор кечиктирилди.

Илгари Илон Маск автомобилни SpaceX технологияси билан жиҳозлаш имконияти ҳақида ҳам гапирган. Гап сиқилган газда ишлайдиган ракета тезлаткичлари тизими ҳақида борган бўлиб, у тезлашишга ёрдам бериши ва машинага ажойиб манёврларни бажаришга имкон бериши керак эди.

2021 йилда “The Joe Rogan Experience” подкастида Маск ҳатто Roadster ердан озгина баландликда муаллақ туриб қолиши мумкинлигини ҳам истисно этмаган.

Жорий йилнинг октябрь ойида компания тескари саноқ таймери ва Roadster ёзуви туширилган пост жойлаштирди. Тескари саноқ 10 октябрь куни якунланиши керак эди, ушбу сана тақдимот куни деб тахмин қилинганди, аммо, кўринишидан, у 16-санага сурилган.