Telegram орқали ишлаган 44 нафар “закладчик” қўлга тушди (видео)

Самарқандда Telegram орқали фаолият юритган яширин наркотармоқ фош этилди. Тезкор тадбирлар давомида 44 нафар шахс қўлга олиниб, 1500 дозага тенг мефедроннинг тарқалишига чек қўйилди. Бу ҳақда вилоят Ички ишлар бошқармаси хабар берди.

Маълум қилинишича, Оқдарё, Самарқанд, Пастдарғом ва Нуробод туманлари, шунингдек Самарқанд шаҳри ҳудудларида Telegram орқали фаолият юритган наркотик савдоси билан боғлиқ канал ва ботлар аниқланган.

Қайд этилишича, ушбу тармоқ орқали синтетик гиёҳвандлик воситаларини “закладка” усулида тарқатиш билан шуғулланган шахслар ушланган. Бунда 21 та яширин жойдан 1500 дозага тенг мефедрон моддаси аниқланиб, унинг ноқонуний айланмасига чек қўйилган.

Мазкур ҳолат юзасидан Ўзбекистон Республикаси Жиноят кодексининг 273-моддаси (гиёҳвандлик воситалари, психотроп моддалар ёки уларнинг аналогларини қонунга хилоф равишда тайёрлаш, сақлаш ва ўтказиш) билан жиноят иши қўзғатилган. Ҳозирда тергов ҳаракатлари давом этмоқда.

Эслатиб ўтамиз, аввалроқ Тошкент шаҳрининг Сергели туманида Telegram орқали гиёҳвандлик воситаларини тарқатиш билан шуғулланганликда гумон қилинган шахс қўлга олинган эди.