“Текинга жанг қилишга тайёрман”. Мелиқўзиев чемпионлик жанги учун гонораридан воз кечмоқчи

WBA жаҳон чемпионилик унвони учун мажбурий даъвогар бўлган ўзбекистонлик профессионал боксчи Бектемир Мелиқўзиев Жаҳон бокс ассоциацияси (WBA) ҳамда ўз дивизионидаги жаҳон чемпиони Хайме Мунгиага ўз эътирозини йўллади. Бу ҳақда боксчи Instagram саҳифасида маълум қилди.

“Тўлов муҳим эмас, мен текинга жанг қилишга тайёрман. Лекин илтимос, менга ва ушбу спорт қоидаларига нисбатан ҳурматсизлик қилишни бас қилинг!
Хайме Мунгиа, сен чемпионлик учун курашишингдан олдин ҳам мен чемпионлик учун мажбурий даъвогар эдим. Сен чемпионсан – мени ҳам худди мен чемпион бўлганимда сени ёки бошқа ҳар қандай боксчини ҳурмат қилганимдек ҳурмат қил.
WBA’ни ҳурмат қил, мухлисларни ҳурмат қил. Улар ҳақиқий рақобат билан ҳақиқий жангни кўришни хоҳлашади, натижаси бошланишидан олдиноқ ҳаммага маълум бўлган жангни эмас!” деб ёзди Бектемир Мелиқўзиев.

Мелиқўзиев бир йилдан ортиқ вақт давомида мажбурий даъвогар мақомида бўлган. Бироқ унинг билдиришича, WBA мексикалик Хайме Мунгиага қоидаларни четлаб ўтиб, чемпионлик жангида иштирок этиш ва камарни қўлга киритиш имконини берган. Шундан сўнг, ўзбекистонлик боксчи WBA’ни адолатсиз қарорлари учун очиқчасига танқид қилди.

Маълумот учун, Мелиқўзиев WBA рейтингининг биринчи поғонасидан жой олган. Ўзбекистонлик боксчи сўнгги жангида ганалик Сена Агбекони техник нокаут билан мағлуб этиб, WBA қитъалараро чемпионлик камарини муваффақиятли ҳимоя қилганди.